پنجاب بھر میں پی ٹی آئی کی لہر آچکی ہے، عمر کوٹ جسلہ ایک تاریخ رقم کر چکا ہے، شاہ محمود قریشی

جمعہ 20 جولائی 2018 00:03

اسلام آباد ۔ (اُردو پوائنٹ اخبار آن لائن۔ جمعرات 19 جولائی 2018ء) پاکستان تحریک انصاف کے رہنما شاہ محمود قریشی نے کہا ہے کہ پنجاب بھر میں پی ٹی آئی کی لہر آچکی ہے، عمر کوٹ میں بھی ہم نے اتنا بڑا جسلہ کیا جو ایک تاریخ رقم کر چکا ہے، ان خیالات کا اظہار انہوں نے جمعرات کو ایک نجی ٹی وی چینل کے پروگرام ’’نیوز ٹاک‘‘ میں گفتگو کرتے ہوئے کیا۔

انہوں نے کہا کہ ہمارے سیاسی مخالفین پاکستان تحریک انصاف کی بڑھتی ہوئی عوامی مقبولیت سے گھبرائے ہوئے ہیں ، اس لئے اب یہ لوگ بے بنیاد الزامات کی سیاست کر رہے ہیں۔

(جاری ہے)

انہوں نے کہا کہ صوبہ سندھ کے عوام ماضی کی حکومتوں سے تنگ آچکے ہیں کیونکہ انہوں نے عوام کے لئے کچھ بھی نہیں کیا، عوام کارکردگی کا مطالبہ کر تے ہیں، عوام کرپشن سے تنگ آئے ہوئے ہیں اور اب تبدیلی چاہتے ہیں اسی لیے عوام پی ٹی آئی کو ترجیح دے رہے ہیں۔

انہوں نے کہا کہ کراچی اور اندرون سندھ میں کچرے کے ڈھیر لگے ہوئے ہیں، سیورج کا نظام بھی نہ ہونے کے برابر ہے جو وہاں ماضی کی حکومتوں کی نااہلی کا منہ بولتا ثبوت ہے۔ شاہ محمود قریشی کا کہنا تھا کہ اگر وہاں پاکستان تحریک انصاف ہوتی تو صورتحال مختلف ہوتی کیونکہ عوامی فلاح و بہبود ہماری اولین ترجیح ہے۔