ایف آئی اے نے ضمنی چالان میں آصف زرداری اور فریال تالپور کے نام مفرور ملزمان کی فہرست میں ڈال کر سپریم کورٹ کے احکامات ہوا میں اڑا دئیے

عدالت عظمیٰ کے فیصلے کو نظرانداز کرنیوالے ایف آئی اے کے افسران کے اس اقدام کا سخت نوٹس لیا جائے، آئینی وقانونی ماہرین

ہفتہ 21 جولائی 2018 23:37

اسلام آباد(اُردو پوائنٹ اخبار آن لائن۔ ہفتہ 21 جولائی 2018ء) ایف آئی اے نے منی لانڈرنگ کیس میں عدالت میں جمع کرائے گئے ضمنی چالان میں سابق صدر آصف علی زرداری اور ان کی بہن فریال تالپور کے نام مفرور ملزمان کی فہرست میں ڈال کر سپریم کورٹ کے احکامات ہوا میں اڑا دئیے۔ سپریم کورٹ نے ایف آئی اے کو حکم دیا تھا کہ انتخابی سرگرمیوں کی وجہ سے آصف زرداری اور فریال تالپور کو 25جولائی تک تنگ نہ کیا جائے۔

ان کے وکلائ نے بھی ایف آئی اے میں پیش ہو کر بیان ریکارڈ کروادیا تھا اس کے باوجود ایف آئی اے نے عدالت میں جمع کرائے گئے عبوری چلان میں ان کا نام مفرور ملزمان کی فہرست میں ڈال دیا ہے۔ زین ملک،شہزاد جتوئی اور دیگر افراد کے نام بھی مفرور ملزمان کی فہرست میں شامل کرا ئے گئے حالانکہ وہ بھی ایف آئی اے کے سامنے پیش ہو چکے ہیں۔

(جاری ہے)

ذارئع کے مطابق ایف آئی اے کی طرف سے جمع کرائے گئے عبوری چالان میں منی لانڈرنگ یا دیگر فوجداری الزامات کے کوئی ثبوت پیش نہیں کیے گئے ہیں ایف آئی اے کے اس اقدام سے بشیر میمن اور نجف مرزا کی بدنیتی واضح اور انتخابات پر اثر انداز ہونے کی گھنائو نی سازش ہے ایف ائی اے کے دونوں افسران سندھ کی گرینڈ ڈیموکریٹک الائنس کے امیدوار کے قریبی عزیز ہیں آئینی وقانونی ماہرین نے سپریم کورٹ سے مطالبہ کیا ہے کہ عدالت عظمیٰ کے فیصلے کو نظرانداز کرنیوالے ایف آئی اے کے افسران کے اس اقدام کا سخت نوٹس لیا جائے۔