گیسٹ ہائوس میں بھارتی خاتون کو 40 افراد چار روز تک ریپ کا نشانہ بناتے رہے

گیسٹ ہاؤس کا مالک اور مینیجر کو گرفتار،خاتون کو نشہ آورچیز کھلا کر متعددافرادنے ریپ کیا،پولیس کا بیان

ہفتہ 21 جولائی 2018 12:00

نئی دہلی(اُردو پوائنٹ اخبار آن لائن۔ ہفتہ 21 جولائی 2018ء)بھارتی خاتون کی جانب سے 40 افراد پر 4 روز تک مبینہ طور پر ریپ کا نشانہ بنانے کے الزام کے بعد پولیس نے گیسٹ ہاؤس کے مالک اور مینیجر کو گرفتار کرلیا۔بھارتی ٹی وی کے مطابق یہ واقعہ بھارت میں خواتین سے زیادتی کی نئی لہر جس میں ایک دن میں 110 ریپ کیسز رپورٹ ہوئے کے بعد سامنے آیا۔

پولیس کو شکایت میں 22 سالہ خاتون کا کہنا تھا کہ انہیں ان کے جاننے والے نے نوکری کا وعدہ کرکے ہریانہ کے شمالی علاقے میں ایک گیسٹ ہاؤس پر بلایا تھا۔سینئر پولیس افسر راجیندر کمار مینا کا کہنا تھا کہ وہاں انہیں قید میں رکھا گیا اور نشہ آور چیزیں کھلا کر 4 روز تک مختلف افراد نے ریپ کا نشانہ بنایا۔ان کا کہنا تھا کہ تین جونیئر پولیس اہلکاروں کو حساس معاملے کو نظر انداز کرنے اور سینیئر حکام کو اطلاع نہ دینے پر برطرف کردیا گیا۔

(جاری ہے)

بھارت میں جنسی تشدد کے واقعات 2012 میں نئی دہلی میں خاتون کے گینگ ریپ کے واقعے کے بعد سے عالمی منظر نامے پر ہے۔نئی دہلی کے واقعے کے بعد سے ملک میں بڑی تبدیلیاں آئی تھیں جس میں ریپ کے حوالے سے قوانین کو انتہائی سخت کیا گیا تھا تاہم اس کے باوجود خواتین کے ساتھ جنسی جرائم کے واقعات کم نہ ہوسکے ہیں۔رواں ہفتے چنائی کے جنوبی شہر میں بھارتی پولیس نے 11 سالہ بچی کے ریپ کے الزام میں 17 افراد کو گرفتار کیا تھا۔