بین الاقوامی انتخابی مبصرین کو مکمل سیکورٹی فراہم کرنے کا فیصلہ

ہر پولنگ اسٹیشن پر 4 فوجی جوان تعینات ہوںگے ،رینجرز کو انتخابات کے دن عارضی طورپر فوج کے ساتھ منسلک کردیا گیا ہے،ڈی سی آفس میں کنڑول روم بھی قائم کیا گیا،ذرائع

منگل 24 جولائی 2018 21:54

اسلام آباد (اُردو پوائنٹ اخبار آن لائن۔ منگل 24 جولائی 2018ء) بین الاقوامی انتخابی مبصرین کو مکمل سیکورٹی فراہم کرنے کا فیصلہ کیاگیاہے اس حوالے سے ڈی آئی جی سیکورٹی نے بتایا کہ الیکشن آبزرورز کو منسٹری آف انٹیریر اور الیکشن کمیشن کی ہدایات کے مطابق مکمل سیکورٹی فراہم کی جائے گی ۔منگل کو ڈی آئی جی سیکورٹی وقار احمد چوہان کے دفتر میں انٹرنیشنل الیکشن آبزرورز کی سیکورٹی کے حوالے سے میٹنگ کا انعقاد ہوا،جس میں یورپی یونین،آسٹریلیا، امریکہ، کنیڈا،انگلینڈ اور کامن ویلتھ کے نمائندوں نے شرکت کی۔

ڈی آئی جی سیکورٹی نے بتایا کہ الیکشن آبزرورز کو منسٹری آف انٹیریر اور الیکشن کمیشن کی ہدایات کے مطابق مکمل سیکورٹی فراہم کی جائے گی ۔

(جاری ہے)

ذرائع کے مطابق اسلام آباد کا سیکورٹی پلان جاری کر دیا گیا،قومی اسمبلی کے 3 حلقوں کیلئے پولیس ،رینجرز ، ایف سی اور آرمی کی تعیناتی طے ہوئی،پولیس 7 ہزار ، آرمی 24 سو ، ربنجرز کے 6 سو اور ایف سی کے 4 سو جوان تعینات ہوںگے، ہر پولنگ اسٹیشن پر آرمی کے 4جوان تعینات ہوںگے ،رینجرز کو الیکشن ڈے پر عارضی طورپر آرمی کے ساتھ منسلک کردیا گیا ہے۔

ذرائع کے مطابق سی سی ٹی وی کیمرے 26 انتہائی حساس پولنگ اسٹیشنز پر نصب کر دیئے گئے ہیں جبکہ ڈی سی آفس میں کنڑول روم قائم کردیا گیا ۔حکام کے مطابق کنٹرول روم میں آئیسکو ، سی ڈی اے ، ریسکیو اور اسپتالوں کے نمائندے بھی موجود ہوںگے ،پولیس سیف سٹی کے مرکز سے شہر کو مانیٹر کرنے کی کوشش کرے گی ، سیف سٹی کے 1840 کیمروں میں سے 524 ایک عرصہ سے خراب پڑے ہیں۔