مسلم لیگ (ن) نے انتخابات کے نتائج پر نظر رکھنے کیلئے مانیٹرنگ روم قائم کردیا

شہباز شریف کی زیر صدارت ماڈل ٹائون میں اجلاس ، انتخابات سمیت دیگر اہم معاملات زیر بحث آئے نوازشریف کی عدم موجودگی میں انتخابی مہم چلانا انتہائی مشکل کام لگا مگر عوام اب (ن) لیگ کیساتھ زیادہ جذباتی لگائورکھتی ہے‘شہباز شریف

بدھ 25 جولائی 2018 00:01

لاہور(اُردو پوائنٹ اخبار آن لائن۔ منگل 24 جولائی 2018ء)مسلم لیگ (ن) نے عام انتخابات 2018ء کے نتائج پر نظر رکھنے کیلئے مانیٹرنگ روم قائم کردیا۔مسلم لیگ (ن) کے صدر شہبازشریف کی زیرصدارت ماڈل ٹائون میں اجلاس ہوا جس میں پرویز رشید، مریم اورنگزیب، مصدق ملک اور آصف کرمانی سمیت دیگر پارٹی رہنمائوں نے شرکت کی۔اجلاس میں عام انتخابات کے لیے ماڈل ٹائون میں (ن) لیگ کا مانیٹرنگ روم بنا دیا گیا جس میں ملک بھر میں انتخابی نتائج اور ووٹرز کے مسائل پر نظر رکھی جائے گی۔

ذرائع کے مطابق اجلاس میں آج بروز بدھ ہونے والے انتخابات کے حوالے سے انتظامات سمیت عوامی خدمت سمیت دیگر اہم معاملات زیر بحث لائے گئے۔اس موقع پر شہباز شریف نے کہاکہ نوازشریف کی عدم موجودگی میں انتخابی مہم چلانا انتہائی مشکل کام لگا مگر 2013ء کے انتخابات کے مقابلے میں 2018ء میں عوام (ن) لیگ کے ساتھ زیادہ جذباتی لگائورکھتی ہے،لاہورمیں نکالی جانے والی ریلی نے تاریخ رقم کردی جو (ن) لیگ کی کامیابی کی نویدہے، لاہور کی ریلی میں کوئی لیگی امیدوار گاڑیاں نہیں لایا بلکہ سپورٹرز اور کارکنوں نے خود ریلی میں بھرپور شرکت کی۔

(جاری ہے)

شہبازشریف نے کہا کہ پنجاب میں انتخابی مہم کے دوران عوام کی محبت کااظہار ن لیگ کی جیت کی صورت میں نکلے گا، پنجاب ، سندھ اورکے پی سمیت پورے ملک سے عوام نے خوب پذیرائی کی۔