اقوام متحدہ کی کشمیر بارے رپورٹ برطانوی پارلیمنٹ میں پیش کی گئی

بدھ 25 جولائی 2018 17:57

لندن(اُردو پوائنٹ اخبار آن لائن۔ بدھ 25 جولائی 2018ء)لندن میں اقوام متحدہ کی انسانی حقوق کونسل کی کشمیر کے بارے میں گزشتہ ماہ جاری ہونیوالی رپورٹ برطانوی دارلامرا میں پیش کی گئی اور اراکین پارلیمنٹ نے حکومت پررپورٹ کی سفارشات پر عمل درآمد کرنے کیلئے زوردیا۔کشمیرمیڈیاسروس کے مطابق لارڈ قربان حسین نے پارلیمنٹ کے ایوان بالا میں یہ مسئلہ اٹھایا اور مقبوضہ جموںوکشمیر میںانسانی حقوق کی پامالیوں کی آزادانہ بین الاقوامی تحقیقات میں سہولت دینے کیلئے برطانوی حکومت پر زوردیا۔

کشمیر کے بارے میں عالمی ادارے کی پہلی رپورٹ کے مطابق جولائی 2016سے رواں سال اپریل تک مقبوضہ علاقے میں انسانی حقوق کی سنگین پامالیاں ہوئی ہیں اور رپورٹ میں 1990کے کالے قانون آرمڈ فورسز اسپیشل پاورز ایکٹ جس کے تحت بھارتی فوجیوں کو انسانی حقوق کی پامالیوں کی کھلی چھوٹ حاصل ہے کی وجہ سے اہلکاروں کے خلاف کارروائی نہ ہونے پر افسوس ظاہر کیا ہے ۔

(جاری ہے)

لارڈ نذیر احمد نے بھی لارڈ قربان کی حمایت کرتے ہوئے کہاکہ اقوام متحدہ کی سلامتی کونسل کامستقل رکن ہونے کی حیثیت سے یہ برطانیہ کی زمہ دار ہے کہ وہ دنیا میں انسانی حقوق کا دفاع او ر تحفظ کرے۔برطانوی حکومت کی طرف سے لارڈ طارق احمد نے بطور وزیر ایوان میں رپورٹ کا جواب دیتے ہوئے کہاکہ نے کہاکہ ہم کشمیر میں مسائل کی اہمیت مسلسل بھارتی حکومت کے ساتھ اٹھاتے رہے ہیں۔انہوںنے اپنے گزشتہ سال کے دوروں کا حوالہ دیتے ہوئے کہاکہ انہوںنے مسئلہ کشمیر کو اجاگر کیا ور اس دیرینہ تنازعے کے حل کیلئے پاکستان اور بھارت کے درمیان مذاکرات کی اہمیت پر زوردیا۔ اقوام متحدہ نے چودہ جون کو کشمیرمیں انسانی حقوق کے بارے میں اپنی پہلی رپورٹ جاری کی تھی ۔