حکومت کی تعلیم،صحت اور انسانی وسائل کی ترقی پرتوجہ،نوجوانوں کو منفی سرگرمیوں کے بجائے موسیقی،ادب اور ثقافت سے اپنی پہچان بنانی ہوگی،

صدرمملکت ڈاکٹر عارف علوی کالاہور میں تقریب سے خطاب

حکومت کی تعلیم،صحت اور انسانی وسائل کی ترقی پرتوجہ،نوجوانوں کو منفی ..
لاہور (اُردو پوائنٹ اخبارتازہ ترین - اے پی پی۔ 02 نومبر2019ء)صدرمملکت ڈاکٹر عارف علوی نے کہا ہے کہ حکومت تعلیم، صحت اور انسانی وسائل کی ترقی پر بھرپور توجہ دے رہی ہے،معاشرے کی ترقی کا راز علم کے فروغ اور انسانی وسائل کی ترقی میں پنہاں ہے، جس معاشرے میں ذہنی دباؤ،گھٹن اور نفرت ہوگی اس کا اظہار قومی سطح پر بھی ہوگا،عدم مساوات افراد اور معاشروں میں کئی مسائل کی وجہ بنتی ہے،نوجوانوں کو منفی سرگرمیوں کے بجائے موسیقی،ادب اور ثقافت سے اپنی پہچان بنانی ہوگی۔

ان خیالات کا اظہار انہوں نے ہفتے کولاہور میں طلباء کے عالمی ہفتے کے حوالے سے کانفرنس سے خطاب کرتے ہوئے کیا۔صدر مملکت نے کہا کہ معاشرے کی ترقی کا راز علم کے فروغ اور انسانی وسائل کی ترقی میں پنہاں ہے، انسانی شخصیت مختلف جذبات کا مجموعہ ہے۔

(جاری ہے)

انہوں نے کہا کہ انفرادی شخصیت کی طرح قوموں کااجتماعی شعور بھی ہوتا ہے، جس معاشرے میں ذہنی دباؤ،گھٹن اور نفرت ہوگی اس کا اظہار قومی سطح پر بھی ہوگا،جو افراد امن پر یقین رکھتے ہیں ان کی اجتماعی سوچ بھی امن کی داعی ہوگی۔

صدر مملکت نے کہا کہ معاشرے میں مساوات کو فروغ دے کر ذہنی دباؤ اور گھٹن میں کمی لائی جاسکتی ہے،عدم مساوات افراد اور معاشروں میں کئی مسائل کی وجہ بنتی ہے۔ ڈاکٹر عارف علوی نے کہا کہ عالمی حدت میں اضافہ موجودہ دور کا بڑا چیلنج بن کر سامنے آیا ہے، بچوں اور نوجوان نسل کو عالمی حدت کے منفی اثرات سے آگاہ کرنا ہوگا،صنعتوں میں اضافہ اور درختوں میں کمی عالمی حدت کی بڑی وجہ ہے۔

صدر مملکت نے کہا کہ نوجوان نسل پاکستانی ثقافت کی دنیا بھر میں سفیر ہے،2005ء کے زلزلے کے بعد پاکستانی نوجوانوں نے امدادی کارروائیوں میں بہترین کردار ادا کیا۔ انھوں نے کہا کہ معاشرے کی خرابیوں کے بجائے مثبت پہلوؤں کو اجاگر کرنے کی ضرورت ہے،نوجوانوں کو منفی سرگرمیوں کے بجائے موسیقی،ادب اور ثقافت سے اپنی پہچان بنانی ہوگی۔ ان کا کہنا تھاکہ موجودہ حکومت نئے پاکستان کیلئے جدوجہد کررہی ہے جہاں تعلیم، صحت اور انسانی وسائل کی ترقی پر بھرپور توجہ دے رہی ہے۔

Your Thoughts and Comments