Anjeer

عمران سجاد :
انجیر ایک مشہور اور صحت بخش پھل ہے ۔ یہ گولر کے پھل سے مشابہ ہوتا ہے ۔ یہ بہت نازک ہوتا ہے، پکنے کے بعد درخت سے اپنے آپ گرجاتا ہے ۔ اس کی دو قسمیں ہیں ، جو ” بستانی“ اور ” خودرو‘ کہلاتی ہیں۔
انجیر بواسیر کو ختم کرتا ہے ۔ جوڑوں کے درد سے نجات پانے کے لیے انجیر کاکھانا مفید ہے ۔ یہ گردے اور مثا نے کی پتھریوں کو خارج کردیتا ہے ۔

زہر کے اثرات کو دور کردیتا ہے۔ حلق، گردے اور مثانے کی سوزشوں کو ختم کرتا ہے۔ انجیر کے ساتھ اگر چند بادام بھی کھالیے جائیں توپیٹ کی بیماریوں سے نجات مل جاتی ہے ۔
انجیر غذائیت سے بھرپور پھل ہے۔ اس میں لحمیات (پروٹینز) ، نشاستہ (کاربوہائڈریٹ ) سوڈیئم ، پوٹاشیئم، کیلسئیم، میگنیزیئم ، فولاد، تانبا، فاسفورس، گندھک اور کلورین جیسے مفید صحت اجزا پائے جاتے ہیں ۔

(جاری ہے)

اس میں سوڈیئم کم اور پوٹاشیئم زیادہ مقدار میں ہوتا ہے۔ ان اجزا کے علاوہ اس میں حیاتین الف اور ج )وٹامنز اے اور سی) زیادہ مقدار میں اور حیاتین ب اور د(وٹامنزبی اور ڈی) قلیل مقدار میں ہوتی ہیں۔ قبض اور کھانسی سے چھٹکارا پانے کے لیے انجیر مفید ہے ۔
جو افراد مٹاپے کا شکار ہوں، انھیں تین انجیر روزانہ کھانے چاہئیں ، اس لیے کہ یہ جسم کی چربی کو گھلادیتا ہے انجیر قوت مدافعت میں اضافہ کرتاہے ۔

یہ درموں کو ختم کردیتا ہے۔انجیر کو دودھ میں پکا کر گاڑھا کرکے اس کا ضماد(پیسٹ ) پھوڑوں، پھنسیوں پر لگانے سے یہ جلد مندمل ہوجاتے ہیں۔ چیچک کے مرض سے نجات پانے کے لیے بھی انجیر کا کھانا فائدہ مند ہے ۔ انجیر کھانے سے چہرے پر نکھار آجاتا ہے۔ یہ کمر کے درد سے نجات دلاتا ہے۔ ہاضمے کے نظام کو درست کرتااور خون کی نالیوں کو صاف کرتا ہے، اس لیے جو افراد دل کی تکلیف میں مبتلا ہوں، انھیں چاہیے کہ وہ انجیر کھائیں ۔

ذیابیطس کے مریضوں کے لیے بھی مفید ہے ۔ یہ جسم کے خراب کولیسٹرول کو کم کردیتا ہے۔ ہڈیوں کو مضبوط کرتا ہے ۔ انجیر میں مانع تکسیداجزا (ANTIOXIDANTS)بھی پائے جاتے ہیں، جو بیماریوں سے نجات دلانے میں اہم کردار ادا کرتے ہیں۔
انجیر پیاس بجھاتا اور آنتوں کو نرم کرتا ہے۔ یہ پیشاب آور پھل ہے۔ اسے نہار منھ کھانے سے آنتوں کی غلاظت خارج ہوجاتی ہے ۔

انجیر سستی اور کاہلی کو دور کرکے جسم میں چستی پیداکرتا ہے اور جسمانی کمزوری کو دورکردیتا ہے۔ انجیر بچوں کے لیے بھی بہت فائدہ مند ہے، اس لیے کہ اس میں ہاضم خمیر (انزائمز) پائے جاتے ہیں، جن سے بچوں کا ہاضمہ درست رہتا ہے۔ جوخواتین اورمرد خون کی کمی کے عارضے میں مبتلا ہوں، وہ روزانہ انجیر کھائیں، بہت فائدہ ہوگا، اس لیے کہ یہ خون بنانے والا پھل ہے۔

یہ جلد اور سانس کے امراض سے بھی محفوظ رکھتا ہے ۔
انجیر کو خراب ہونے سے بچانے کے لیے اسے پہلے خشک کرلیا جاتا ہے۔ پھر اسے چپٹا کرکے رسی میں پرولیا جاتا ہے۔ اس طرح یہ طویل عرصے تک خراب نہیں ہوتا۔ انجیر کھانے سے بلڈپریشر بھی معمول پر آجاتا ہے۔ انجیر زیادہ مقدار میں نہیں کھانے چاہییں ، کیوں کہ زیادہ مقدار میں کھانے سے اسہال کا خطرہ ہوتا ہے۔ انجیر بہت صحت بخش پھل ہے، دوسرے پھلوں کی طرح اسے بھی روزانہ مناسب مقدارمیں کھاناچاہیے ، تاکہ ہم صحت مند اور توانا رہیں۔