Makai - Jaaron Ka Behtareen Tohfa - Article No. 2337

حکیم حارث نسیم سوہدروی
مکئی ساری دنیا میں کاشت کی جاتی ہے،مگر اس کا پہلا وطن امریکہ ہے۔مکئی دو اقسام کی ہوتی ہے،زرد اور سفید۔سفید مکئی کا ذائقہ عمدہ اور لذیذ ہوتا ہے،جب کہ زرد قسم غذائیت کے اعتبار سے اچھی ہوتی ہے۔زرد رنگ کی مکئی میں بیٹا کیروٹین (Beta Carotene) پائی جاتی ہے۔بیٹا کیروٹین جسم میں حیاتین الف(وٹامن اے)بنانے میں مدد دیتی ہے اور اس کے ہضم و جذب میں بھی اہم کردار ادا کرتی ہے۔

بیٹا کیروٹین بصارت کو بہتر کرتی ہے۔
مکئی میں کاربن کی مقدار بہت زیادہ ہوتی ہے،اسی لئے یہ تیزی سے اُگتی اور اس کی پیداوار بھی زیادہ ہوتی ہے۔مکئی کا تعلق گھاس کے خاندان سے ہے۔ہمارے ہاں موسم سرما میں مکئی بڑی رغبت سے کھائی جاتی ہے۔اس کے نرم اور میٹھے بھٹے بھون کر اور اُبال کر بھی کھائے جاتے ہیں۔

(جاری ہے)

سردی کے موسم میں ریڑھیوں پر گرم اور بھنے ہوئے بھٹے نمک یا لیموں چھڑک کر عام فروخت کیے جاتے ہیں،جو بہت لذیذ ہوتے ہیں اور لوگ انھیں بڑی رغبت سے کھاتے ہیں۔

مکئی سے تیار کردہ پاپ کارن (Popcorn) بچے بہت شوق سے کھاتے ہیں۔
بعض لوگ سادے بھٹے پسند کرتے ہیں۔مکئی سے آٹا بھی تیار کیا جاتا ہے۔مکئی کے آٹے سے بنی ہوئی روٹیاں موسم سرما میں لوگ بہت شوق سے کھاتے ہیں۔مکئی کی روٹی اور ساگ پنجاب کا روایتی اور ثقافتی کھانا شمار کیا جاتا ہے۔مکئی کی روٹی غذائیت سے بھرپور ہوتی ہے۔مکئی سے دلیا بھی بنایا جاتا ہے۔

مکئی کا شمار دنیا بھر میں غلے کی حیثیت سے کیا جاتا ہے۔مکئی کے بیجوں سے تیل (Corn Oil) بھی نکالا جاتا ہے،جو صحت کے لئے بہت مفید ہوتا ہے۔یہ تیل بازار میں بہ آسانی ملتا ہے۔یہ تیل کولیسٹرول کی سطح متوازن رکھتا ہے۔اس طرح یہ قلب کے لئے مفید ہے۔
ماہرینِ صحت کے مطابق زیتون کے بعد دوسرے نمبر پر مکئی کا تیل ہے،جو صحت پر بہت اچھے اثرات مرتب کرتا ہے۔

مکئی ہر لحاظ سے صحت کے لئے مفید ہے۔اسے کھانے سے خون میں کولیسٹرول کی سطح نہیں بڑھتی۔جن افراد کا کولیسٹرول بڑھ گیا ہو،ان کو مکئی کی روٹی ساگ کے ساتھ کھانی چاہیے۔اس سے جسم کو ریشے کی خوب مقدار مل جائے گی اور کولیسٹرول کی مقدار مناسب رہے گی۔اس طرح آنتوں کی کارکردگی بھی بہتر رہے گی۔ہمیں اللہ تعالیٰ کی عطا کردہ اس نعمت سے خوب استفادہ کرنا چاہیے۔اس طرح قلب کے مسائل سے محفوظ رہیں گے۔سردی کے موسم میں لذیذ و مفید مکئی کھائیے اور صحت مند رہیے۔