Vitamin F Ki Ahmiyat Aur Afadiyat - Article No. 2660

آج کل چکنائی اور روغنیات کے خلاف اس قدر آواز اُٹھائی جا رہی ہے کہ بہت سے لوگ بے سوچے سمجھے گھی،دودھ اور مکھن وغیرہ کھانا ترک کرتے جا رہے ہیں۔اس میں کوئی شک نہیں کہ فربہ افراد کے لئے ان غذائی اشیاء کا کھانا مضر ہے،لیکن ساتھ ساتھ یہ بھی نہیں بھولنا چاہیے کہ چکنائی میں بعض ایسی خوبیاں ہوتی ہیں کہ ہم اُس کے بغیر اچھی صحت حاصل نہیں کر سکتے۔حیاتین ف (وٹامن ایف) روغنیات ہی میں پائی جاتی ہے،جو ہماری صحت کے لئے نہایت ضروری ہے۔
حیاتین ف کی کمی سے کولیسٹرول خون میں آسانی سے جمع ہونے لگتا ہے۔آپ نزلے زکام اور جراثیم سے لگنے والی دوسری بیماریوں کے شکار ہونے لگتے ہیں،جلد خشک ہو جانے کی وجہ سے داد،چنبل،خشکی،کمزور ناخن،سر کی خشکی،بالوں کا گرنا،قبض اور جنسی کمزوری کا خطرہ پیدا ہو جاتا ہے۔

(جاری ہے)

چربی اور چکنائی دو طرح کی ہوتی ہے:ایک وہ جو گوشت،گھی،دودھ اور مکھن میں پائی جاتی ہے اور دوسری وہ جو بعض ترکاریوں اور تیلوں میں پائی جاتی ہے۔آپ کہہ سکتے ہیں کہ ایک چربی حیوانی ہے اور دوسری نباتاتی۔دونوں میں آسانی سے امتیاز کیا جا سکتا ہے۔ایک کمرے کے درجہ حرارت پر ہی جم جاتی ہے (بالخصوص موسم سرما میں) اور دوسری نہیں جمتی۔
حیاتین ف حیوانی چربی میں اُتنا نہیں پائی جاتی،جتنا نباتاتی روغنوں میں ملتی ہے،مثلاً مکئی کا تیل،سرسوں کا تیل اور بنولے کا تیل،جن بچوں کو حیاتین ف پوری مقدار میں نہیں ملتی،وہ اکثر سانس اور جلد کی بیماریوں میں مبتلا ہو جاتے ہیں۔