Achi Neend K 10 Tarikay - Article No. 1139

شکیل صدیقی:
ذیل میں ایسے طریقے بتائے جارہے ہیں جن پر عمل کرکے آپ گہری نیند لے سکتے اور تازہ دم ہوسکتے ہیں:
(1)صبح آپ پرواز سے کہیں جارہے ہوں یا ہنگامی طور پر آپ کو جلد بیدار ہوکر کوئی کام کرنا ہو، جس سے آپ کی نیند مکمل نہ ہورہی ہوتو اس کے لیے فکر مند ہونے کی ضرورت نہیں۔ آپ دن میں کسی وقت سو کر اپنی نیند پوری کرسکتے ہیں ۔ خلائی ادارے ناسا کے پائلٹوں نے بتایاہے کہ اگر آپ 26 منٹ کے لیے گہری نیند سوجائیں تو پوری طرح سے تروتازہ ہوسکتے ہیں۔
(2)سائنس داں کہتے ہیں کہ رات کو بستر پر جانے سے پہلے ٹیلی وژن دیکھنا چھوڑ دیں، کمپیوٹر پر کام کرنا بند کردیں اور اپنے موبائل فون کو بھی بند کردیں۔ کمرے میں ہلکی روشنی والا سبز یا نیلا بلب جلائیں،اس لیے کہ یہ روشنیاں ٹھنڈی ہوتی ہیں اور اعصاب کو سکون بخشتی ہیں۔

(جاری ہے)

ّ(3)بعض افراد کی خواب گاہیں گرم ہوتی ہیں۔ ایئر کنڈیشنر کو اس طرح سے سیٹ کیجئے کہ کمرا ٹھنڈا رہے۔ کمرے کا درجہٴ حرارت جتنا کم ہوگا، آپ کو اتنی ہی اچھی نیند آئے گی۔ آپ کی خواب گاہ کا درجہٴ حرارت 18,5 سے لے کر20 درجے سینٹی گریڈ ہونا چاہیے۔
(4)نیند لانے کے لیے خود کو آمادہ کیجئے اور ہلکی پھلکی کتابوں کا مطالعہ کیجیے۔ لطیفوں کی کتابیں پڑھیے یا ڈائجسٹ وغیرہ ہاتھ میں لیجئے۔
(5)وہ افراد جنھیں بے خوابی کی شکایت ہو ، وہ سونے سے پیشتر دس پندرہ منٹ تک دھیمے سُروں والی موسیقی سُنیں تو انھیں اچھی نیند آجائے گی اور بے خوابی دور ہوجائے گی۔
(6)بون یونی ورسٹی (جرمنی)میں کی گئی ایک تحقیق کے مطابق وہ افراد جو کام کی زیادتی کی وجہ سے 24 گھنٹوں میں تھوڑی دیر کے لیے بھی نہیں سوپاتے، وہ پراگندہ ذہنی میں مبتلا ہوجاتے ہیں، انھیں ہیولے نظر آتے ہیں، انھیں خوشبو کی پہچان نہیں رہتی اور وقت گزرنے کا احساس بھی جاتا رہتا ہے۔24 گھنٹوں میں سے سونے کے لیے ضرور کچھ وقت نکالیے۔
(7)الی نائے(امریکا)کی ایک یونی ورسٹی کے ماہر کہتے ہیں کہ آپ سونے کے دوران بہت کچھ سیکھ سکتے ہیں۔ اگر آپ موسیقی کی کوئی مدھر دھن ہیڈ فون کے ذریعے سنیں گے تو یہ آپ کی یادداشت میں محفوظ ہوجائے گی اور آپ کو نیند کی وادیوں میں لے جائے گی۔ اسی خیال کو بنیاد بنا کر سوئٹزرلینڈ کی دو جامعات نے غیر ملکی زبانوں کو سکھانے کے لیے اسباق تیار کیے ہیں، جورات کو سونے سے پیشتر سنے جاتے ہیں، تاکہ ان اسباق کے الفاظ آپ کی یاداشت میں جگہ بنالیں۔ ان اسباق کو 90 منٹ تک سننے سے آپ لفظوں سے مانوس ہونے لگتے ہیں۔ مسلسل اس طریقے پر عمل کرنے سے آپ دوسری زبانیں بھی سیکھ سکتے ہیں۔
(8) ماہرینِ صحت کے مطابق خواتین کے مقابلے میں مردوں کو اچھی اور گہری نیند نہیں آتی۔ اصل میں نیند کا تعلق اچھی صحت سے بھی ہے، لہٰذا اپنی صحت پر توجہ دینا بہت ضروری ہے۔
(9)جب بستر پر لیٹیں تو کسی متحرک چیز کا تصور نہ کریں، مثلاََ میدان سے گزرتی ہوئی بھیڑیں یا سڑکوں پر دوڑتے ہوئی گاڑیاں، بلکہ ساکت منظر کا تصور کریں۔ اس کے باوجود اگر پندرہ یا بیس منٹ تک نیند نہ آئے تو بستر چھوڑ کر دوسرے کمرے میں چلے جائیں اور کوئی ایسا مشغلہ اختیار کریں جس میں آپ خاموشی سے منہک ہوجائیں، مثلاََ چند منٹ کے لیے کوئی کتاب پڑھیں۔ تھوڑی دیر میں آپ کو نیند آنے لگے گی۔
(10)آپ کو غنودگی اس وقت محسوس ہوتی ہے، جب ایک سالمہ ،(MOLECULE )،جسے ”ایڈینوسائن“ کہتے ہیں، دماغ کے حاسوں سے چمٹ جاتا ہے اور ان کی حرکات وسکنات کو سست کرنا شروع کردیتا ہے، لہٰذا آپ کو نیند آجاتی ہے۔ کیفین کا معاملہ اس کے برعکس ہے۔ کیفین کے سالمے”ایڈینوسائن“ کی طرح دکھائی دیتے ہیں اور دماغ کے انھی حاصوں سے چمٹ سکتے ہیں،جن کی حرکات و سکنات کو ”ایڈینوسائن“ سست کردیتا ہے۔ یہ سالمے ”ایڈینوسائن“ کے فعل پر اثر انداز ہوکر اس کے کام کو بند کردیتے ہیں، جس کی وجہ سے غنودگی ختم ہوجاتی ہے اور دماغ مستعد ہوجاتا ہے۔