Hijama Tambako Noshi Se Nijat Ka Muasar Ilaj - Article No. 2876

طبیبہ حفصہ العباسی
عالمی ادارہ صحت کی حال ہی میں کی جانے والی ایک رپورٹ کے مطابق ”دنیا میں اب پانچ میں سے ایک فرد تمباکو نوشی کی علت کا شکار ہے، جبکہ پاکستان میں 15 سال یا اس سے زائد عمر کے افراد میں تمباکو نوشی کے استعمال کی شرح 9.16 فیصد ہے۔“اس اعتبار سے دیکھا جائے، تو ہمارے ملک میں تمباکو نوش افراد کی تعداد میں اضافہ ہو رہا ہے، جبکہ عالمی سطح پر اس میں کمی واقع ہو رہی ہے۔عالمی ادارہ صحت کے زیرِ اہتمام کیے جانے والے سالانہ گلوبل یوتھ ٹوبیکو سروے کے مطابق ”پاکستان میں روزانہ تقریباً بارہ سو ایسے نابالغ بچے تمباکو نوشی شروع کر دیتے ہیں، جن کی عمریں محض چھ سے پندرہ برس کے درمیان ہوتی ہیں۔“یوں کم عمری میں بچے ایسے امراض کا شکار ہو جاتے ہیں، جو بڑھاپے میں لاحق ہوتے ہیں۔

(جاری ہے)

تمباکو نوشی کی وجہ سے جسم میں کاربن کی مقدار بڑھ جاتی ہے اور آکسیجن کی مقدار میں کمی واقع ہو جاتی ہے، جو سانس کے امراض، کھانسی، پھیپھڑوں کی صلاحیت میں کمی وغیرہ کا سبب بنتی ہے۔

اس کے علاوہ امراضِ قلب، فالج، پھیپھڑوں کی دائمی بیماری، مختلف طرح کے کینسرز (مثلاً پھیپھڑے، منہ، غذائی نالی، مثانے، گردے، معدے، لبلبے، حلق، گال، ہونٹ، نرخرے اور بچہ دانی)، مہ، السر، بانجھ پَن اور سی او پی ڈی (Chronic Obstructive Pulmonary Disease) جیسے کئی اور عوارض سے متاثر ہونے کے امکانات بھی بڑھ جاتے ہیں۔سیکنڈ ہینڈ اسموکنگ (یعنی تمباکو نوش کے ساتھ موجود دیگر افراد، اہلِ خانہ، خصوصاً بچے جو دھوئیں سے متاثر ہوتے ہیں) بالغ افراد میں امراضِ قلب، سانس کی بیماریاں، ہارٹ اٹیک، پھیپھڑوں کا سرطان اور بچوں میں اچانک موت کے امکانات بڑھا دیتا ہے۔اب سگریٹ نوشی کے نت نئے ٹرینڈز متعارف ہو چکے ہیں۔جیسے ویپنگ، ای سگریٹ اور ٹوبیکو پاؤچ وغیرہ۔اکثر شہروں کے مہنگے کاروباری اور رہائشی علاقوں میں ویپنگ شاپس نظر آتی ہیں، جبکہ نکوٹین اور دیگر مضرِ صحت اجزاء والے ٹوبیکو پاؤچ بھی عام دکانوں پر ٹافیوں کی طرح فروخت کیے جاتے ہیں۔تمباکو نوشی کے مضر اثرات بے شمار ہیں۔جیسے سگریٹ نوشی کا زائد استعمال قبل ازوقت بوڑھا کر دیتا ہے، اور چہرے کی مخصوص چمک دمک ختم ہو جاتی ہے۔اس سے دماغی صحت پر بھی گہرا اثر پڑتا ہے اور سوچنے کی صلاحیت میں کمی واقع ہوتی ہے۔
ایک تحقیق کے مطابق سرطان کے ہر دس مریضوں میں نو اسموکرز ہوتے ہیں۔یعنی پھیپھڑوں کے سرطان کے نوے فیصد مریض اسموکنگ کے عادی ہوتے ہیں۔سگریٹ نوش افراد میں نمونیے سے متاثر ہونے کے امکانات بھی خاصے بلند ہیں۔سگریٹ نوشی کی لت سے بازو اور جسم ڈھلک جاتے ہیں۔ہونٹ کے گرد جھریاں اور بل پڑنے لگتے ہیں۔جلد کھردری اور رنگ پیلا پڑ جاتا ہے۔اصل میں سگریٹ میں چار ہزار ایسے مضر کیمیائی مادے پائے جاتے ہیں، جو جھریوں، چھائیوں، دانے اور جلد لٹکنے سمیت کئی طبی مسائل کا سبب بنتے ہیں۔تمباکو نوش افراد کے دانت عموماً برش کرنے کے باوجود پیلے نظر آتے ہیں۔
عمر بڑھنے کے ساتھ بالوں کا جھڑنا ایک فطری عمل ہے، لیکن تمباکو نوش افراد کے بال زیادہ جھڑتے ہیں، جبکہ ان کے ناخنوں کا رنگ بدل جاتا ہے اور وہ کھردرے ہو جاتے ہیں۔تاہم، یہ بُری علت ترک کرنے کے نتیجے میں ناخن پھر سے نارمل ہو جاتے ہیں۔تمباکو نوشی کے مضر اثرات ہڈیوں پر بھی مرتب ہوتے ہیں۔ہڈیاں پہلے کی طرح مضبوط نہیں رہتیں۔سگریٹ کے ضرر رساں اجزاء سے دل کی شریانیں بلاک ہونے کے نتیجے میں ہارٹ اٹیک ہو سکتا ہے۔خون گاڑھا ہو جاتا ہے۔حاملہ خواتین میں تمباکو نوشی کی علت ناتواں اور کمزور بچے کو جنم دینے کا سبب بنتی ہے۔سگریٹ نوشی کی لت سے چھٹکارا پانا قطعاً ناممکن نہیں، بس اس کے لئے مضبوط ارادے اور خود کو مثبت مشغلوں میں مصروف رکھنے کی ضرورت ہے۔تمباکو نوشی کی علت سے نجات کے لئے معالج کے مشورے سے بعض ادویہ بھی استعمال کی جا سکتی ہیں۔
حجامہ کے ذریعے تمباکو نوشی سے نجات
حجامہ کے ذریعے تمباکو نوشی سے نجات ممکن ہے۔حجامہ قدیم طریقہ علاج ہے، جس کی دو اقسام ہیں۔(1) حجامہ مع الشرط، جس میں نشتر یا چیرا لگے اور خون کا اخراج ہو۔(2) حجامہ بلا شرط، جس میں خون کا اخراج نہ ہو۔تمباکو نوش افراد کے لئے حجامہ مع الشرط فائدہ مند ہے۔اس کے ذریعے جسم سے خراب، مضرِ صحت خون نکال دیا جاتا ہے، جو کئی خطرناک بیماریوں سے محفوظ رکھتا ہے۔حجامہ سے قوتِ مدافعت بڑھتی ہے، جسم میں موجود کاربن خارج اور آکسیجن صاف ہوتی ہے۔حجامہ ایک غیر جراحی عمل ہے، جس میں فاسد یا خراب خون جسم سے نکالا جاتا ہے۔اس مقصد کے لئے جسم میں چند مخصوص حجامہ پوائنٹس منتخب کیے جاتے ہیں۔ان میں سے کسی ایک پوائنٹ پر خون اکٹھا کر کے ایک چھوٹے سے ویکیوم سسٹم کے ذریعے کھینچ کر نکالا جاتا ہے۔ویکیوم سسٹم کیا ہے، تو جس فرد کا حجامہ کرنا ہو، سب سے پہلے جسم کے مطلوبہ حصے پر زیتون کا تیل لگایا جاتا ہے، تاکہ مطلوبہ جگہ پر گرمائش پیدا ہو سکے۔بعد ازاں صاف ستھرے جراثیم سے پاک کپس جلد پر لگا دیے جاتے ہیں۔پھر اگلے مرحلے میں ایک پمپنگ مشین کی مدد سے ویکیوم پیدا کی جاتی ہے۔چونکہ کپس لگانے کے نتیجے میں جلد کو آکسیجن فراہم نہیں ہوتی، تو کپس والا مخصوص حصہ سوج جاتا ہے۔جوں ہی سوجن نمایاں ہوتی ہے، چھوٹے چھوٹے کٹس لگا کر پھر دوبارہ ان ہی مقامات پر کپس لگا دیئے جاتے ہیں۔یوں جسم سے خراب خون رس کر 10 سے 15 منٹ میں ان کپس میں جمع ہو جاتا ہے۔
اگر دونوں کندھوں کے درمیان حجامہ کروایا جائے، تو یہ تمباکو نوشی ترک کرنے میں مفید ثابت ہوتا ہے۔اس سے خون کی صفائی ہو جاتی ہے۔بلند فشار الدم میں مدد ملتی ہے اور پھیپھڑوں کی صفائی ہو جاتی ہے۔اس کے لئے تین ماہ تک حجامہ کروایا جائے۔اس عرصے میں جہاں تمباکو نوشی کی بُری علت سے چھٹکارا ملتا ہے، وہیں سر درد، ذہنی دباؤ اور تناؤ میں خاصی کمی آتی ہے۔اس کے علاوہ حجامہ کئی بیماریوں کا موٴثر علاج گردانا جاتا ہے۔مثلاً سینے کا درد، بے خوابی، پاخانے کی جگہ پر ناسور، پیٹ کے نچلے حصے کا درد، پیچش، پیشاب بند ہونا، بہرا پَن، سائینو سائیٹس، نیند زیادہ آنا، پاؤں کی رگیں پھولنا، السر، عمومی سر درد، ران درد، پیشاب کے غدود کے مسائل، ٹی بی، نمونیا، سینے کی بیماریاں، معدے کی جلن، بدہضمی، بڑی آنت کے مسائل، ذہنی اضطراب و پریشانی، یادداشت کی کمزوری، کھانسی، مثانے کا ورم، گلے کے غدود کے مسائل، امراضِ چشم، بھوک نہ لگنا، گردن کے مہروں میں درد، گلے کا درد، دانت اور کان کے مسائل، لقوہ، آواز بند ہونا، جلدی بیماریاں اور پیشاب خارج ہونا وغیرہ۔