Jismani O Zehni Sehat Ke Liye Bharpur Neend Zaroori Hai - Article No. 2901

عالیہ کاشف عظیمی
دن بھر کی مشقت کے بعد رات کی بھرپور نیند توانائیاں بحال کر دیتی ہے۔یہ ایک قدرتی عمل ہے کہ سونے کی حالت میں جہاں جسمانی مشینری کی مرمت ہوتی ہے، وہیں روح بھی نورانی روشنیوں سے سیراب ہوتی ہے، نتیجتاً سو کر اُٹھنے کے بعد ہمیں تازگی اور ایک نئے جوش و ولولے کا احساس ہوتا ہے۔جسمانی مشینری کی مرمت کے لئے ہمیں کوئی اہتمام نہیں کرنا پڑتا کہ یہ کام اللہ کے مربوط نظام کے تحت انجام پاتا ہے، البتہ روح کو نورانی روشنیوں سے سیراب کرنے کے لئے قرآنِ پاک کا کچھ حصہ پڑھ لیا جائے۔نبی صلی اللہ علیہ وآلہ وسلم کا ارشاد ہے:”جو شخص اپنے بستر پر آرام کرنے کے وقت قرآنِ پاک کی کوئی سورت پڑھتا ہے، تو اللہ تعالیٰ اس کے پاس ایک فرشتہ بھیجتا ہے۔

(جاری ہے)

یہ فرشتہ ہر تکلیف دہ چیز سے اس کے بیدار ہونے تک اس کی حفاظت کرتا ہے، خواہ وہ کسی بھی وقت نیند سے بیدار ہو۔“
سونے کے لئے ایسی جگہ کا انتخاب کریں، جہاں تازہ ہوا کا گزر ہو۔

ایسے بند کمروں میں سونے سے اجتناب برتیں، جہاں تازہ ہوا کا گزر نہ ہوتا ہو۔اکثر لوگ منہ لپیٹ کر سوتے ہیں۔یہ عادت ترک کر دیں، کیونکہ اس طرح سونے سے جسمانی و ذہنی صحت پر مضر اثرات مرتب ہوتے ہیں۔سوتے ہوئے چہرہ کھول کر سوئیں، تاکہ تازہ ہوا ملتی رہے۔باوضو ہو کر سوئیں، ذہن کو پریشان کُن، افسردہ باتوں اور یادوں کی آماج گاہ نہ بننے دیں، بلکہ مثبت سوچیں۔سب سے افضل تو یہی ہے کہ دل ہی دل میں اللہ کے پاک کلام کا ورد کر لیں یا مسنون دعائیں پڑھ لیں۔
طبی اعتبار سے سونے سے قبل ورزش کرنا ٹھیک نہیں، اس کے بجائے مراقبہ یا آسان یوگا کی مشق کر سکتے ہیں۔نیند کا دورانیہ اتنا ہو کہ صبح تازہ دم بیدار ہوں۔کہا جاتا ہے کہ روزانہ آٹھ گھنٹے کی نیند ضروری ہے، وگرنہ جسمانی و ذہنی صحت کو نقصان پہنچتا ہے۔اس ضمن میں طبی ماہرین کا کہنا ہے کہ نیند کی مطلوبہ مقدار ہر فرد کی مختلف ہوتی ہے، لہٰذا کسی دوسرے کے ساتھ موازنہ کرنے یا نیند کے دورانیے کے بارے میں زیادہ فکر کرنے کی قطعاً ضرورت نہیں۔سب سے اہم بات یہ ہے کہ صبح اُٹھنے کے بعد تھکاوٹ کے بجائے تازگی محسوس ہو۔اگر بے خوابی کی شکایت ہو تو ڈاکٹر سے مشورہ کر لیں۔سیلف میڈی کیشن یا نیند کی دوائیوں پر انحصار سے گریز کریں۔یاد رکھیے، جسمانی و ذہنی صحت کے لئے بھرپور نیند ضروری ہے۔