Roze Rakhne Ke Baad Insani Jism Mein Kya Tabdiliyan Aati Hain - Article No. 2681

شازیہ اسلم
رمضان المبارک اسلامی کیلنڈر کا سب سے مقدس مہینہ ہے جہاں مسلمان سورج طلوع ہونے سے لے کر غروب آفتاب تک اللہ کی رضا کے لئے روزہ رکھتے ہیں اور اپنا زیادہ تر وقت عبادت میں گزارتے ہیں۔تو کیا آپ نے کبھی سوچا کہ رمضان کے 30 دن روزہ رکھنے کے بعد آپ کے جسم کیا تبدیلیاں آتی ہیں؟دبئی کی ماہر غذائیت ڈاکٹر لینا شبیب کا کہنا ہے کہ ایک ماہ کے لئے روزہ رکھنا اور اس دوران ہر کھانے پینے کی اشیاء سے دور رہنا جسم کے نظام میں بہتری لاتا ہے اور شفایاب کرتا ہے۔
یادداشت میں بہتری
کنگز کالج لندن کے انسٹی ٹیوٹ آف سائیکاٹری (نفسیات) سائیکالوجی اینڈ نیورو سائنس کی ایک نئی تحقیق کے مطابق روزہ دماغی قوت کو بڑھاتا ہے،یادداشت کو بہتر بناتا ہے اور نئے ”ہپپوکیمپل“ نیوران پیدا کرتا ہے،جو اعصابی امراض سے بچانے میں مدد کرتے ہیں۔

(جاری ہے)

ڈاکٹر لینا شبیب کا کہنا تھا کہ روزے کے دوران تناؤ میں کمی کے علاوہ نئے نیورانز پیدا ہوتے ہیں جو یادداشت بہتر بنانے میں مدد کرتے ہیں۔

شوگر،دل،جگر کی بیماریوں سے نجات
اسی طرح روزے کی حالت میں جسم کے دیگر حصوں میں بھی ماہرین صحت نے اعضاء کے کام میں باریک تبدیلیاں دیکھی ہیں۔مثال کے طور پر ڈاکٹر لینا شبیب کا کہنا ہے کہ عام دنوں کے مقابلے روزے کے دوران ہمارے جسم میں گلوکوز کی مقدار کم ہوتی ہے،ایک تحقیق میں بتایا گیا کہ روزہ رکھنے سے ہمارے جسم کو زہریلے مادوں سے نجات ملتی ہے،اس کے علاوہ ماہِ صیام میں روزے رکھنے کے بعد جگر اور گردے جیسے اعضاء کا نظام کئی گنا بہتر ہو جاتا ہے۔
جسم کی زہریلی چربی میں کمی
یونیورسٹی آف سڈنی،چارلس پرکنز سنٹر کے ایک جائزے میں 70 مطالعات سے معلوم ہوا ہے کہ رمضان کے دوران ان لوگوں کے جسم میں چربی کی مقدار میں کمی واقع ہوتی ہے جن کا وزن زیادہ ہوتا ہے یا جو موٹاپے کا شکار ہوتے ہیں۔چونکہ روزے میں میٹابولزم میں تیزی،بھوک اور ہارمونز متوازن ہوتے ہیں اس لئے روزہ ان لوگوں کے لئے خاص طور پر مفید سمجھا جاتا ہے جو وزن میں واقعی کمی لانا چاہتے ہیں۔ڈاکٹر لینا شبیب کا کہنا تھا کہ رمضان میں جسمانی تبدیلیوں جیسی فوائد لوگ محسوس کرتے ہیں لیکن اس کے ساتھ ساتھ دن بھر عبادت،دعائیں ذہنی سکون حاصل کرنے میں مدد دیتی ہیں۔