وزیر اعلی پنجاب کی ہدایت پر مخدوم جاوید ہاشمی کے طبی معائنہ کے لئے اعلی سطحی میڈیکل بورڈ میں توسیع

لاہور(اُردوپوائنٹ اخبارتازہ ترین۔23 جولائی۔2010ء) وزیر اعلی پنجاب محمد شہباز شریف کی خصوصی ہدایت پر ممتا ز مسلم لیگی رہنما و ممبرقومی اسمبلی مخدوم جاوید ہاشمی کے طبی معائنہ کے لئے اعلی سطحی میڈیکل بورڈ میں توسیع کر دی گئی ہے - آج بروز ہفتہ ملک بھر کے نامور سرجنزاور فزیشنز پر مشتمل 20 رکنی میڈیکل بورڈ طبی معائنہ کرے گا جن کی مشاورت سے مزید علاج کے بارے میں حکمت عملی طے کی جائے گی - پرنسپل لاہور جنرل ہسپتال پروفیسر ڈاکٹر طارق صلاح الدین نے میڈیا کے نمائندوں کو بریفنگ دیتے ہوئے بتایا کہ جمعة المبارک کو مخدوم جاوید ہاشمی کا ایم آر آئی کرایا گیا فکر کی کوئی بات نہیں ان کے علاج کے لئے تمام طبی سہولتیں لاہور جنرل ہسپتال میں دستیاب ہیں جبکہ ان کے اہل خانہ علاج سے مطمئن ہیں اور انہوں نے بیرون ملک یا پرائیویٹ ہسپتال میں علاج کرانے کی بجائے سرکاری ہسپتال کو ترجیح دی ہے - انشاء اللہ تعالی جنرل ہسپتال کے ڈاکٹران کے اعتماد پر پورا اتریں گے - پروفیسر طارق صلاح الدین نے میڈیا کے نمائندوں کے سوالات کے جواب میں کہا کہ برین ہیمبرج کے مریضوں کے لئے پہلے 72 گھنٹے بہت اہم ہوتے ہیں اب مخدوم جاوید ہاشمی کی حالت خطرے سے باہر ہے - ان کا بلڈ پریشر کنٹرول اور شوگر نارمل ہے جبکہ جمعرات کو کرائی جانے والی تشخیصی ٹیسٹوں کی رپورٹس بھی تسلی بخش ہیں - انہیں روزانہ ہلکا پھلکا ناشتہ کروایا جا رہا ہے- وہ اخبارات کا مطالعہ بھی کر رہے ہیں - پروفیسر طارق صلاح الدین نے مزید کہا کہ وزیر اعلی پنجاب محمد شہباز شریف علاج کو براہ راست مانیٹرنگ کر رہے ہیں اور روزانہ انہیں علاج اور تشخیصی رپورٹس بارے آگاہ کیا جاتا ہے - میاں شہباز شریف دن میں کئی بار معالجین سے ان کی خیریت دریافت کرتے ہیں - پرنسپل جنرل ہسپتال نے کہا کہ میڈیکل بورڈ کی رائے کے بارے میں صحافیوں کو آج ہفتے کے روز چار بجے ہسپتال کے کمیٹی روم میں بریفنگ دی جائے گی - انہوں نے عوام سے اپیل کی کہ وہ ممتاز سیاسی شخصیت مخدوم جاوید ہاشمی کی جلد صحت یابی کیلئے دعا کریں - پروفیسر طارق صلاح الدین نے واضح کیا کہ برین ہیمبرج کے باعث جو کلاٹ بنا تھا وہ تیزی سے تحلیل ہو رہا ہے دماغ کی سوجن کافی حد تک کم ہوگئی جبکہ خون کی شریانوں میں کوئی گچھا نہیں - انہوں نے کہا کہ جس آئی سی یو میں مخدوم جاوید ہاشمی زیر علاج ہیں وہاں دوسرے مریضوں کا بھی بلا امتیاز علاج کیا جا رہا ہے - انہوں نے کہا کہ جاوید ہاشمی کی مکمل صحت یابی تک جنرل ہسپتال کے معالجین ہمہ وقت اپنے پیشہ وارانہ فرائض محنت او رلگن سے ادا کرتے رہیں گے -