فیصل ۱ٓباد، انسداد خسرہ مہم 15سے 27،اکتوبر تک جاری رہے گی

فیصل آباد(اُردو پوائنٹ اخبارتازہ ترین - اے پی پی۔ 05 اکتوبر2018ء) حکومت پنجاب کی ہدایت پر فیصل ۱ٓبادمیں انسداد خسرہ مہم 15سے 27،اکتوبر تک جاری رہے گی جس کے دوران 6ماہ سے 7سال تک کی عمر کے 11لاکھ 68ہزار300بچوںکو خسرہ سے بچائو کے حفاظتی ٹیکے لگائے جائیں گے جس کیلئے محکمہ صحت کی مجموعی طور پر 1033ٹیمیںڈیوٹی پرمامور ہونگی جبکہ 24ہزار816سوشل موبلائزرز کی خدمات بھی حاصل کی جائیں گی۔

یہ بات ڈپٹی کمشنر سید احمدفواد کی زیرصدارت انسداد خسرہ مہم کے ضروری انتظامات کے سلسلے میں منعقدہ اجلاس کے دوران بتائی گئی جس میں ایڈیشنل ڈپٹی کمشنرز ملک مشتاق حسین نائچ،قیصر عباس رند،اسسٹنٹ کمشنر سٹی ڈاکٹر انعم،سی ای او ہیلتھ ڈاکٹر مشتاق سپرا،ڈسٹرکٹ ہیلتھ آفیسر ڈاکٹر محمد آصف شہزاد،ڈسٹرکٹ کوآرڈینیٹر وبائی امراض ڈاکٹر بلال احمد،ڈپٹی ڈسٹرکٹ ہیلتھ افسران،میڈیکل سپرنٹنڈنٹس،محکمہ تعلیم،سوشل ویلفئر،لیبرودیگر محکموں کے افسران کے علاوہ عالمی ادارہ صحت،پرائیویٹ سکولز اور پختون آبادیوں کے نمائندے بھی موجود تھے۔

(جاری ہے)

ڈپٹی کمشنر نے ہدایت کی کہ انسداد خسرہ مہم پر عملدرآمد کے سلسلے میں مربوط مائیکرو پلان ترتیب دیا جائے جبکہ سٹاف کی ٹریننگ کا عمل بھی جلد مکمل کریں۔انہوںنے سرکاری ونجی تعلیمی اداروں کی انتظامیہ کو خسرہ مہم کے ایام سے قبل ازوقت آگاہ کرنے کی تاکید کی اور کہا کہ بچوں کو خسرہ کی بیماری سے بچائو کے لئے مہم بڑی اہمیت کی حامل ہے جس میں معمولی سی بھی غفلت کی گنجائش نہیں۔

انہوں نے خسرہ مہم کے بارے میں شہری ودیہی علاقوں میں والدین کی آگاہی کیلئے اعلانات کرانے سمیت دیگر تشہیری ذرائع بھی بروئے کار لانے کی ضرورت پر زور دیا۔ڈپٹی کمشنر نے کہا کہ مہم کی مسلسل مانیٹرنگ کی جائے اور کسی وجہ سے رہ جانے والے بچوں تک رسائل حاصل کرنے کے لئے بھی خصوصی اقدامات ہونے چاہیں۔اجلاس کے دوران ڈسٹرکٹ ہیلتھ آفیسر نے بتایا کہ مہم کے دوران سوشل موبلائزرز گھر گھر جا کر والدین کو ریفرنس سلپ دیں گے اور بچوں کو 312 ٹیمیں خسرہ سے بچائو کے لئے مختص کردہ پوائنٹس پر ٹیکے لگائیں گی جبکہ 721آئوٹ ریچ ٹیمیں سکولوں میں جاکر ویکسینیشن کریں گی۔

انہوں نے بتایا کہ خسرہ مہم پر عملدرآمد کے سلسلے میں سٹاف کی ٹریننگ کا عمل جاری ہے جبکہ دیگر ضروری انتظامات کو حتمی شکل دی جارہی ہے ۔انہوں نے بتایا کہ مہم کے دوران سی ای او ہیلتھ کے دفتر میں کنٹرول روم کام کرے گا جہاں فون نمبر041-9200371فنکشنل رہے گا۔