عالمی یوم گلوکوما کے حوالے سے لاہور جنرل ہسپتال میں آگاہی واک اور سیمینار کا انعقاد

لاہور(اُردو پوائنٹ اخبارتازہ ترین - این این آئی۔ 18 مارچ2019ء) عالمی یوم گلوکوما (کالا موتیا) کے حوالے سے لاہور جنرل ہسپتال میں آگاہی واک اور سیمینار کا انعقاد ہوا جس سے خطاب کرتے ہوئے پرنسپل پوسٹ گریجویٹ میڈیکل انسٹی ٹیوٹ پروفیسر محمد طیب نے کہا کہ اس میں کوئی شک نہیں کہ بینائی سے محروم افراد ملکی ترقی اور خاندانی کفالت میں کردار ادا نہیں کر پاتے اور ایک طرح سے معاشرے پر خود ذمہ داری سمجھے جاتے ہیں اور خود دنیا اُن کیلئے اندھیرے کے سوا کچھ نہیں ہوتی ۔

انہوں نے کہا کہ دنیا بھر میں8کروڑ افراد کالا موتیا کی بیماری کا شکار ہیں جن میں سے 20لاکھ کا تعلق صرف پاکستان سے ہے اور پروفیسر محمد معین و دیگر ماہرین کے مطابق پاکستان میں کالا موتیا کی شرح سب سے زیادہ ہے جس کی بڑی وجہ اس مرض کی فوری طور ہر تشخیص نہ ہونا اور عوامی سطح پر آگاہی کا فقدان ہے۔

(جاری ہے)

انہوں نے کہا کہ ضرورت اس امر کی ہے کہ عوام میں مہم چلائی جائے کہ وہ ابتدا سے ہی اپنی آنکھوں کی دیکھ بھال کو یقینی بنائیں ۔

انہوں نے کہا کہ آنکھیں بڑی نعمت ہیں ان کی قدر اُس شخص سے پوچھیں جو ان سے محروم ہو چکا ہے ۔ تقریب کے مہمان خصوصی ڈاکٹر محمد یقین اور گیسٹ آف آنر سابق ایم پی اے ڈاکٹر صائمہ امجد نے لاہور جنرل ہسپتال کی طرف سے ورلڈ گلوکوما ویک کے انعقاد کو سرایتے ہوئے کہا کہ ڈاکٹر ز اور مریضوں کے مابین اعتماد کا تعلق قائم رہنا چاہیے تاکہ دکھی انسانیت کی خدمت میں زیادہ بڑھ چڑھ کر حصہ لیا جا سکے ۔

انہوں نے کہا کہ ذیابیطس ،امراض قلب اور ہائی بلڈ پریشر کے علاوہ خون میں کمی کالا موتیا کا باعث بنتی ہے اور یہ ایک ایسی بیماری ہے کہ اس کا علاج جس دن شروع کیا جائے اُس دن تک ہوجانے والا نقصان واپس نہیں آتا۔ انہوں نے کہا کہ ہمیں اپنی آنکھوں کی حفاظت کیلئے تمام وسائل برؤئے کار لانا چاہیے اور زیادہ سے زیادہ احتیاط کو یقینی بنانا چاہیے ۔

اس موقع پر پروفیسر محمد معین نے گفتگو کرتے ہوئے کہا کہ آنکھوں کی عام بیماریوں میں بصارت کی کمزوری، بھینگا پن،پردہ بصارت کا متاثر ہونا، الرجی، سفید اور کالا موتیا شامل ہیں۔ انہوں نے کہا کہ کالے موتیا کا علاج فوری طور پر شروع نہ کرنے سے بینائی سے محرومی کا اندیشہ ہوتا ہے۔ ڈاکٹر حسین احمد خاقان کا کہنا تھا کہ کالے موتیا کی علامتیں بینائی کو نقصان پہنچانے کے بعد ہی ظاہر ہوتی ہیں اگر آنکھوں اور سر میں درد، نظر کی کمزوری، چکر آنا ، آنکھوں کا سرخ ہو جانا اور دھندلا پن ہو تو فورا ڈاکٹر سے رجوع کرنا چاہئے۔

انہوں نے کہا کہ 40سال کی عمر کے بعد آنکھوں کا معائنہ کروانا چاہئے ۔ مقررین نے انکشاف کیا کہ اس وقت پاکستان میں بروقت علاج نہ کروانے اور کم علمی کی وجہ سے 10لاکھ کے قریب افراد اندھے پن کا شکار ہیں۔