کانگو وائرس کے پھیلائو کا خدشہ، قومی ادارہ صحت نے خصوصی ایڈوائزری بھی جاری کر دی

اسلام آباد (اُردو پوائنٹ اخبارتازہ ترین - اے پی پی۔ 18 جولائی2019ء) قومی ادارہ صحت نے کانگو وائرس کے پھیلائو کے ممکنہ خطرات کے پیش نظر انسانوں اور مویشیوں کے بنیادی صحت کے حکام اور متعلقہ مختلف فریقین کو عیدالاضحی کی آمد سے قبل بروقت خصوصی اقدامات اٹھانے کی ہدایت کی ہے۔ این آئی ایچ نے اس ضمن میں خصوصی ایڈوائزری بھی جاری کر دی ہے جس میں کہا گیا ہے کہ جانوروں کی نقل و حمل عیدالاضحی کے موقع پر بہت بڑھ جاتی ہے جس کی وجہ سے انسانوں اور مویشیوں کے ایک دوسرے کے قریب آنے سے کانگو وائرس کے پھیلائو کے خطرات بڑھ جاتے ہیں جن میں سب سے زیادہ انسانوں میں کانگو وائرس پھیلنے کا امکان ہوتا ہے۔

پالتو جانوروں کے علاوہ جنگلی جانوروں میں بھی کانگو وائرس چیچڑ کی وجہ سے پھیلنے کا خدشہ ہوتا ہے اور عیدالاضحی کے موقع پر مختلف شہروں سے مال مویشی خرید کر منڈیوں میں لائے جاتے ہیں جس کی وجہ سے چیچڑ جانوروں سے جانوروں میں منتقل ہونے کے علاوہ ان کے اثرات انسانوں میں منتقل ہونے کا بھی خدشہ ہوتا ہے اور انسانوں کے انسانوں کے ساتھ قریبی روابط سے یہ وائرس منتقل ہونے کا خدشہ ہوتا ہے لہٰذا اس ضمن میں خصوصی اقدامات اٹھانے کی ضرورت اور تمام احتیاطی تدابیر جو ایڈوائزری میں جاری کی گئی ہیں کہ دستانے پہننے اور مؤثر آلات کے ذریعے دیگر احتیاطی تدابیر جن میں ہاتھ دھونا وغیرہ شامل ہیں، جاری کی گئی ہیں اور کہا گیا ہے کہ متاثرہ مریض سے ملتے وقت یہ احتیاطی تدابیر اختیار کی جائیں اور ممکنہ اموات کی صورت میں متاثرہ شخص کی مناسب ادویات کے چھڑکائو اور مناسب انداز میں تدفین کرنی چاہئے۔

(جاری ہے)

این آئی ایچ نے زراعت، مال مویشی کی دیکھ بھال کرنے والے افراد، قصابوں اور مذبحہ خانوں میں کام کرنے والوںکو بھی خصوصی احتیاطی تدابیر اختیار کرنے کی ضرورت پر زور دیا ہے اور بنیادی صحت سے وابستہ کارکنوں کو بھی ایسے مریضوں کے علاوج اور دیکھ بھال کے دوران خصوصی احتیاطی تدابیر اختیار کرنے پر زور دیا گیا ہے اور مرض کی بھی نشاندہی کرتے ہوئے صحت مراکز کو ہدایت کی گئی ہے کہ وہ کانگو وائرس کی موجودگی کی علامات اور احتیاطی تدابیر سے متعلق آگاہی والے پوسٹرز اور بینرز نمایاں طور پر آویزاں کریں اور شہریوں کو بھی ہدایت کی ہے کہ وہ قربانی کے جانوروں سے اپنے بچوں کو دور رکھیں اور ان کی دیکھ بھال کرتے ہوئے احتیاطی تدابیر اختیار کریں تاکہ کانگو وائرس سے محفوظ رہا جا سکے۔