پرائیویٹ اسپتالوں اور سینٹرز کے ڈس ایبل سرٹیفکیٹس کو قابل قبول نہیں سمجھا جائیگا،شفیق احمد مہیسر

سکھر(اُردو پوائنٹ اخبارتازہ ترین - این این آئی۔ 17 اکتوبر2019ء) کمشنرسکھر ڈویژن شفیق احمد مہیسر نے گونگے اور بہرے افراد کی تصدیق کے لئے سرکاری ٹیسٹنگ سینٹر نہ ہونے پر تعجب کا اظہار کرتے ہوئے ڈس ایبلز کی فلاح و بہبود کے محکمے کے افسران پر اظہار برہمی کیا اور کہا ہے کہ تمام معذورین کی تصدیق کے لئے سول اسپتال سکھر میں ماڈل ٹیسٹنگ سینٹر کا قیام عمل میں لایا جائے جہاں کنسلٹنٹ مقرر کر کے انکا شیڈول جاری کیا جائے تا کہ کسی بھی حقیقی معذور کے ساتھ نوکریوں یا کسی اور شعبے میں نا انصافی نہ ہو سکے۔

انہوںنے یہ ہدایات اپنے آفس کے کانفرنس روم میں ڈیف اینڈ ڈمب کی سر ٹیفیکیشن نہ ہونے کے سلسلے میں ان مسائل کے حل کے لئے منعقدہ اجلاس کی صدارت کے دوران دیں۔ اجلاس کے دوران ڈپٹی ڈائریکٹر ڈس ایبلز ڈیپارٹمنٹ قدوس میمن نے بتایا کہ ہیرنگ ٹیسٹ نہ ہونے کے باعث ڈھائی سو سے زیادہ کیس التواء کا شکار ہیں، سکھر اور لاڑکانہ ڈویژنز میں کہیں بھی سرکاری طور پر ڈیف اینڈ ڈمب ٹیسٹنگ سینٹر موجود نہیں ہے جس کی وجہ سے پریشانی کا سامنا کرنا پڑ رہا ہے ۔

(جاری ہے)

کمشنر سکھر نے متعلقہ افسران کو معزوروںکا اصل ڈیٹا جمع کرکے فراہم نہ کرنے پر ان پر برہمی کا اظہار کیا اور کہا کہ ڈس ایبلز کی فلاح و بہبود سے متعلق محکمہ اپنے فرائض بہتر طریقے سے پورے کرے کیونکہ معذورین کے ساتھ ناانصافی قطعی برداشت نہیں کی جائے گی ۔کمشنرسکھر ڈویژن شفیق احمد مہیسر نے ڈپٹی ڈائریکٹر کو ہدایت کی کہ متعلقہ محکمے کے آفس میںٹیسٹنگ سینٹر کے قیام کے لئے پی سی -ون بناکر فوری طور پر سیکریٹری کو ارسال کی جائے تا کہ یہ اسکیم آئندہ اے ڈی پی میں شامل کی جا سکے ۔

ایم ایس جی ایم سی اسپتال سکھر ڈاکٹر تسلیم اختر خمیسانی نے بتایا کہ ہیرنگ ٹیسٹ کے لئے مشین سکھر بلڈ بینک اسپتال نے ڈونیٹ کرنے کا کہا ہے جس کی لیڈ لینی ہوگی اور ساؤنڈ پروف کمرے کی تعمیر کی بھی ضرورت ہے جبکہ دیگر معذورین کے ٹیسٹ اسپتال میں ہو رہے ہیں ۔کمشنرسکھر ڈویژن شفیق احمد مہیسر نے ہدایت کی کہ ابتدائی طور پر سکھر سول اسپتال میں معذوری کی تصدیق کے لئے ٹیسٹنگ سینٹر قائم کیا جائے جس کو ماڈل کے طور پر لیا جائے اور فوری طور پر ہیئرنگ ٹیسٹنگ مشین کا بندوبست کیا جائے اور مشین نصب کی جائے اس ضمن میں اگر فنڈز کی ضرورت ہو تو وہ ڈونیٹ کرواکے دینگے۔

انہوں نے کہا کہ پرائیویٹ ہسپتالوں اور سینٹرز کے ڈس ایبل سرٹیفکیٹس کو قابل قبول نہیں سمجھا جائیگا، کیونکہ پرائیویٹ سرٹیفکیٹ میں جعلی ہونے کا خدشہ ہوتا ہے جو کہ حقیقی معذوروں کے ساتھ ناانصافی ہوگی کمشنر سکھر نے کہا کہ معذوری والے سرٹیفکیٹ میں سرکاری افسر کی اصل دستخط اور اسٹیمپ ہونا لازمی ہے جس کے بغیر سرٹیفیکٹ قبول نہیں کیا جائیگا۔ انہوں نے کہا کہ ماڈل کے طور پر سول ہسپتال سکھر میں ڈیف اینڈ ڈمب کے ساتھ تمام معذورین کی تصدیق کیلئے ٹیسٹنگ سینٹر بنایا جائے اور ٹیسٹنگ سینٹر میں کنسلٹنٹ ڈیوٹی کا شیڈول جاری کیا جائے۔