سابق وفاقی وزیر حمید اللہ آفریدی نے انتخابی ایجنڈے کا اعلان کر دیا، تعلیم و صحت کی سہولتوں میں اضافہ،قبائلیوں خصوصا خیبر ایجنسی کی علاقائی روایات کا تحفظ ،سوئی گیس کے لئے منظور شدہ 2 ارب روپے کے فنڈز کی منصفانہ تقسیم ، گیس کے تکمیل شدہ سروے کے بعد اس منصوبے کو پائیہ تکمیل تک پہنچانا،بنیادی ضروریات زندگی کی فراہمی اورقومی ترقی میں فاٹا کو نمایاں مقام دلانا اولین ترجیحات ہوں گی ،سابق وفاقی وزیر ماحولیات و امیدوار این اے 45 ،46 حمید اللہ جان آفریدی کا کارنر میٹنگ سے خطاب

پشاور (اُردو پوائنٹ اخبار تازہ ترین۔آئی این پی۔3اپریل۔ 2013ء) سابق وفاقی وزیر ماحولیات و امیدوار این اے 45 ،46 حمید اللہ جان آفریدی نے اپنے انتخابی ایجنڈے کا اعلان کر دیا ہے ۔ انہوں نے پشاور میں ایک کارنر میٹنگ سے خطاب کرتے ہوئے کہا کہ تعلیم و صحت کی سہولتوں میں اضافہ،قبائلیوں خصوصا خیبر ایجنسی کی علاقائی روایات کا تحفظ ،فاٹا کو صوبہ بنانے کی جدو جہد،سوئی گیس کے لئے منظور شدہ 2 ارب روپے کے فنڈز کی منصفانہ تقسیم ، گیس کے تکمیل شدہ سروے کے بعد اس منصوبے کو پائیہ تکمیل تک پہنچانا،بنیادی ضروریات زندگی کی فراہمی اورقومی ترقی میں فاٹا کو نمایاں مقام دلانا ہماری اولین ترجیحات ہیں۔

انہوں نے اس عزم کا اظہار کیا کہ جس طرح گذشتہ دس سالوں میں ہم نے خیبر ایجنسی باڑہ کے عوامی مسائل کے حل کیلئے خود کو وقف کئے رکھا اور بلا امتیاز تمام اقوام کی خدمت کی اسی طرح انشاء اللہ انتخابات میں کامیابی کے بعد ترقی کا یہ سفر آئندہ بھی جاری رکھیں گے اور فاٹا کی تمام ایجنسیز کو ملک کے دیگر علاقوں کے ہم پلہ لانے میں کوئی کسر اٹھا نہیں رکھیں گے ۔

(جاری ہے)

انہوں نے کہا ہم نے ترقیاتی منصوبوں کے ثمرات قبائلی عوام کے گھر گھر پہنچائے ہیں بنیادی ضروریات زندگی کی فراہمی کا سلسلہ اسی جذبے کے ساتھ جاری رکھیں گے۔ حمیداللہ جان آفریدی نے کہا پانچ سال تک منظر سے غائب رہنے والے انتخابات کے موسم میں میدان میں آگے ہیں اور بلند بانگ دعوے کرکے ووٹرز کو گمراہ کر رہے ہیں۔انہوں نے کہا اب وقت خالی باتوں اور نعروں کا نہیں عمل کا ہے الیکشن میں جذباتی نعرے لگانے والے ناکامی کے بعد ایک بار پھر روپوش ہو جائیں گے اور جس طرح اب اچانک عوامی نمائندگی کے لئے سامنے آئے ہیں اسی طرح پانچ سالوں کے بعد پھر ظاہر ہو جائیں گے۔

حمید اللہ جان آفریدی نے کہاکہ ڈرگ مافیا الیکشن سے ناک آوٹ ہو جائے گا اور جو حلقے کے عوام کے سامنے سرخرو ہیں وہی باقی رہ جائیں گے ۔ انہوں نے کہاکہ خالی بیانات پر الیکشن جیتنا ممکن نہیں عوام جانتے ہیں کہ کون ا ن سے مخلص ہے اورکون محض عوامی ہمدردیاں حاصل کرنے کے لئے سبز باغ دکھا رہا ہے۔ حمید اللہ جان آفریدی نے کہاکہ فاٹا اس وقت پوری دنیا کی توجہ کا مرکز ہے اور ہمارے لئے یہ نادر موقع ہے کہ ہم سیاسی بیداری پیدا کریں اور مقتدر حلقوں کواس علاقے کے مسئلے کے دیرپا اورپرامن حل کے لئے قائل کریں اس سے فاٹا میں ترقی اور خوشحالی کے نئے دور کا آغاز ہو گا اور فاٹا کے عوام پرامن زندگی گزارسکیں گے۔