29اپریل سے لاہور میں انسداد خسرہ کی خصوصی مہم کا آغاز ہوگا،تمام پرائمری سکولوں میں بچوں کو خسرہ سے بچاؤ کے ٹیکے لگائے جائیں گے،بچوں کو خسرہ کے ٹیکے لگوانے سے انکار کرنے والے نجی سکول کو بند کرد یا جائے گا،لاہور کے تمام سرکاری ہسپتالوں میں خسرہ کی ویکسنیشن کی جائے گی، موبائل ٹیمیں محلوں میں جاکر ٹیکے لگائیں گی,ہر ٹاؤن میں ڈی ڈی اوایچ مہم کا انچارج نگرانی کرے گا660موبائل ، 165سکول اور 265فکس ٹیمیں تشکیل دے دی گئیں، سیکرٹری صحت کی زیر صدارت انسداد خسرہ کی خصوصی مہم کے سلسلہ میں مائیکرو پلاننگ کا جائزہ اجلاس

لاہور(اُردو پوائنٹ تازہ ترین اخبار۔آئی این پی۔ 27اپریل 2013ء) سیکرٹری صحت پنجاب عارف ندیم نے کہا ہے کہ لاہور میں انسداد خسرہ کی خصوصی مہم کا آغاز 29اپریل سے کیا جارہا ہے، جو5مئی تک جاری رہے گی جس کے دوران تمام سرکاری و نجی پرائمری سکولوں میں بچوں کو خسرہ سے بچاؤ کے ٹیکے لگائے جائیں گے،بچوں کو خسرہ سے بچاؤ کے ٹیکے لگوانے سے انکار کرنے والے سکول کو سیل کر دیا جائے گا۔

(جاری ہے)

انہوں نے یہ بات آج یہاں انسداد خسرہ کی خصوصی مہم کے سلسلہ میں مائیکرو پلاننگ کا جائزہ لینے کیلئے لاہور کے تمام ٹاؤنز کے ڈپٹی ڈسٹرکٹ آفیسرز صحت کے اجلاس کی صدارت کرتے ہوئے کہی-اجلاس میں ڈی سی او لاہور سید رضوان محبوب، ایڈیشنل سیکرٹری صحت (ایڈمن) عظمت محمود، ایڈیشنل سیکرٹری صحت(ٹیکنیکل) ڈاکٹر انور جنجوعہ، ڈائریکٹر جنرل ہیلتھ پنجاب ڈاکٹر تنویر احمد، ای ڈی او ہیلتھ لاہور ڈاکٹر ذوالفقار علی ، ڈائریکٹر ہیلتھ ای پی آئی ڈاکٹر منیر احمد، ڈائریکٹر پبلک ریلیشنز( نیوز) محکمہ تعلقات عامہ رائے نذر حیات و دیگر افسران نے شرکت کی- سیکرٹری صحت نے بتایا کہ900انجیکٹرز(Injectors)فکس پوائنٹس پر6ماہ سے 10سال تک کی عمر کے بچوں کو خسرہ سے بچاؤ کے ٹیکے لگائیں گے - اس ہفتہ کے دوران پولیو ورکرز ہر یونین کونسل اور محلے کی سطح پر گھر گھر جاکر لوگوں کو ان کے علاقہ میں خسرہ کے انجیکشن لگانے والی ٹیم کے بارے میں اطلاع دیں گے- سیکرٹری صحت نے ہدایت کی کہ تمام علاقوں میں بینرز، سٹیمرز لگا کر لوگوں کو خسرہ سے بچاؤ کے ٹیکوں کے بارے راہنمائی فراہم کی جائے اور مساجد کے لاؤڈ سپیکرز و دیگر ذرائع سے ٹیموں کی آمد بارے اعلانات کیے جائیں اس موقع پر ڈی سی او لاہور سید رضوان یوسف نے بتایا کہ انسداد خسرہ کی مہم کیلئے لاہور کے تمام ٹی ایم ایز کے افسران کی ڈیوٹیاں لگادی گئی ہیں اور -29اپریل سے 5مئی تک مہم بھرپور چلائی جائے گی- ای ڈی او صحت لاہور ڈاکٹر ذوالفقار علی نے بتایا کہ ٹیکے لگانے کیلئے 660موبائل ، 165سکول اور 265فکس ٹیمیں تشکیل دی گئی ہیں جن کو تربیت بھی دی جاچکی ہے اور ای ڈی او صحت کے دفتر میں ایک کنٹرول روم بھی قائم کر دیا گیا جس کا فون نمبر042-99237028ہے-انہوں نے بتایا کہ ایک ٹیم ایک دن میں تقریبا350بچوں کو خسرہ سے بچاؤ کے ٹیکے لگائے گی- سیکرٹری صحت نے ہدایت کی کہ انسداد خسرہ کی خصوصی مہم کی مانیٹرنگ پر خصوصی توجہ دی جائے اورہر ٹاؤن کا ڈی ڈی او ایچ اپنے ٹاؤن میں کوریج کا ذمہ دار ہوگا- عارف ندیم نے انسداد خسرہ کی مہم کی زیادہ سے زیادہ تشہیر پر زور دیا - انہوں نے کہا کہ پرنٹ اور الیکٹرانک میڈیا پر اشتہارات کے علاوہ اس مقصد کیلئے بینرز، سٹیمرز اور فلیکس آویزاں کئے جائیں تاکہ لوگوں کوراہنمائی اور آگاہی فراہم کی جائے۔