واسا انسداد ڈینگی مہم میں کلیدی کردار ادا کر رہاہے،راجہ شوکت

راولپنڈی (اُردو پوائنٹ اخبارتازہ ترین - اے پی پی۔ 09 جولائی2020ء) ڈینگی سے بچائو کا شعور اجاگر کرنے کے لیے و اسا راولپنڈی نے انسداد ڈینگی دن منایا جس کا بنیادی مقصد اس موذی وباء سے متعلق شعور بیدار کرنا ہے اور اس سے بچائو کی تدابیر اور حکومتی اقدامات سے عام لوگوں کو روشناس کروانا ہے ۔ اس موقع پر منیجنگ ڈائریکٹر واساراجہ شوکت محمود نے بتایا کہ واساراولپنڈی انسداد ڈینگی مہم میںاپنا کلیدی کردار ادا کر رہاہے اور اس موذی وباء سے چھٹکارے تک تمام محکموں بلخصوص سٹی ڈسٹرکٹ گورنمٹ اور محکمہ صحت کے شانہ بشانہ کام کرتارہے گا ۔

انہوں نے تفصیلات بتاتے ہوئے کہاہے کہ واسا نے راول ٹائون اور پوٹھوہار ٹائون میں 9انسداد ڈینگی ٹیمیں تشکیل دی ہے جو روزانہ کی بنیاد پر اپنے اپنے ایریے میں انسداد ڈینگی ایکٹوٹیز سرانجام دے رہی ہیں ٹیموں کے تمام ممبران محکمہ صحت سے تربیت یافتہ ہیں اور ڈینگی لاروے اور مچھر کی پہچان کر سکتے ہیں اس کے ساتھ ساتھ واسامحکمہ صحت کی گھر گھر سرویلنس کرنے والی ٹیموں کے ساتھ مل کر کام کر رہا ہے اورجہا ں بھی لاروا کی نشاندہی ہوتی ہے اس گھر میں فوری طور واٹر ٹینکر سے صاف پینے کا پانی فراہم کیا جاتا ہے تاکہ جس پانی میں لاروے کی نشاندہی ہوتی ہے اسے فوری طور پر تلف کیا جا سکے ۔

(جاری ہے)

اسی طر ح شہر بھر میں کھڑے پانی کی نکاسی کیلئے بھی واسا کی سکر اور جیٹنگ مشینیں ہمہ وقت تیار ہیں انہوں نے مزید کہا ہے کہ واسا کے تمام دفاتر ، واٹر ورکس ، ٹینکیاں ،ٹیوب ویل اور ملازمین کی رہائشی کالونیوں میں صفائی ، مین ہول کے ڈھکنوں کا معائنہ، فالتو سامان اور پرانے ٹائروں کو ٹھکانے لگانے کا کام کیا گیا ہے دفاتر کے لانز ، گملوں، ِ چھتوں ، پانی کی ٹینکیوں کا بھی معائنہ کیا جارہا ہے اور کھڑے پانی کوفوری طور پر صاف کیا جاتاہے صفائی کے عملے کو روزانہ کی بنیاد پر اس سارے عمل کو دہرانے کی ہدایات دی گئی ہیں ۔

انہوں نے عوام الناس سے بھی اپیل کی ہے کہ وہ تمام اداروں کے ساتھ مل کر کام کریں ۔اپنے گھروں،محلے اور ارد گرد کے ماحول کو صاف رکھیں اور ڈینگی سے بچائو کی احتیاطی تدابیر پر پوری طرح عمل کریں تاکہ اس موذی وباء سے مکمل چھٹکارہ حاصل کیا جاسکے ۔ آخر میں تمام شرکاء نے ڈینگی آگاہی واک میں حصہ لیا اورمری روڈ پر لوگوں میں پمفلٹس تقسیم کیے۔