وزیراعلیٰ سے سماجی شعبہ میں کام کرنے والی بین الاقوامی این جی او اکیومن فنڈ کی چیف ایگزیکٹو آفیسر کی ملاقات،نوجوانوں کو آسان شرائط پر قرض دینے کیلئے پنجاب روزگار بینک کے قیام کا منصوبہ بنایا ہے، محمد شہبازشریف،پنجاب حکومت سماجی شعبہ کی بہتری کیلئے اربوں روپے خرچ کر رہی ہے، کم وسیلہ طبقات کا معیار زندگی بلند کرنے کیلئے جامع پروگرام پر عمل پیرا ہیں،توانائی، ہاؤسنگ، تعلیم، صحت اور دیگر شعبوں میں مزید بہتری کیلئے اکیومن فنڈ کے بین الاقوامی تجربے سے استفادہ کرنا چاہتے ہیں،وزیراعلیٰ نے صوبے میں سماجی شعبہ کی بہتری کیلئے انتہائی متاثرکن اقدامات کئے ہیں‘ جیکولین نووگریٹزکی ملاقات میں گفتگو

لاہور (اُردو پوائنٹ اخبار تازہ ترین۔23نومبر۔2013ء) وزیراعلیٰ پنجاب محمد شہبازشریف سے سماجی شعبے میں کام کرنے والی بین الاقوامی این جی او اکیومن فنڈ کی چیف ایگزیکٹو آفیسر جیکولین نووگریٹز نے ملاقات کی جس کے دوران پنجاب حکومت اور اکیومن فنڈ کے مابین سماجی شعبے میں بہتری لانے کیلئے اشتراک کار بڑھانے پر اتفاق کیا گیا۔ وزیراعلیٰ محمد شہباز شریف نے اس موقع پر گفتگو کرتے ہوئے کہا کہ پنجاب حکومت سماجی شعبہ کی بہتری کیلئے اربوں روپے خرچ کر رہی ہے۔

کم وسیلہ طبقات کے معیار زندگی کو بلند کرنے کیلئے جامع اور انقلابی پروگرام پر عمل پیرا ہیں۔ صحت، توانائی، تعلیم اور ہاؤسنگ کے شعبوں میں بہتری لائی جا رہی ہے۔ انہو ں نے کہا کہ پنجاب حکومت 10 ارب روپے سے ایجوکیشنل انڈومنٹ فنڈ کا پروگرام کامیابی سے چلا رہی ہے جس سے 50 ہزار سے زائد ہونہار اور کم وسیلہ طلبا و طالبات کے تعلیمی اخراجات ادا کئے جا رہے ہیں۔

(جاری ہے)

اس کے علاوہ حکومت نے نوجوانوں کو اپنے پاؤں پر کھڑا کرنے کیلئے آسان شرائط پر قرضہ سکیم بھی شروع کی ہے جس سے2 لاکھ سے زائد نوجوان مستفید ہو کر اپنے خاندان کی کفالت کر رہے ہیں اورایسے قرضوں کی واپسی کی شرح 99 فیصد سے زائد ہے۔ وزیراعلیٰ نے کہا کہ حکومت نے صوبے میں پنجاب روزگار بینک کے قیام کا منصوبہ بنایا ہے جس کے ذریعے نوجوانو ں کو آسان شرائط پر قرضے دیئے جائیں گے۔

انہو ں نے کہا کہ حکومت توانائی بحران سے نمٹنے کیلئے بھی ٹھوس حکمت عملی پر تیزی سے کام کر رہی ہے۔ پنجاب میں ٹیوب ویلوں کو بائیوگیس سے چلانے کی منصوبہ بندی کی گئی ہے اور اس ضمن میں جرمن کمپنی سے معاہدہ طے پا گیا ہے۔ گھریلو صارفین کیلئے سولر ہوم سلوشن متعارف کرانے پر غور کیا جا رہا ہے۔ وزیراعلیٰ نے کہا کہ پنجاب حکومت اکیومن فنڈ کے بین الاقوامی تجربے سے فائدہ اٹھانا چاہتی ہے اور اس ضمن میں اشتراک کار کے ذریعے توانائی، ہاؤسنگ، تعلیم، صحت اور دیگر سماجی شعبوں کی بہتری کیلئے مل کر کام کیا جاسکتا ہے۔

اکیومن فنڈ کی چیف ایگزیکٹو آفیسر جیکولین نووگریٹز نے بات چیت کرتے ہوئے کہا کہ اکیومن فنڈ پنجاب حکومت کے ساتھ سماجی شعبے کی بہتری کیلئے مل کر کام کرنا چاہتا ہے۔ وزیراعلیٰ شہبازشریف نے صوبے میں سماجی شعبہ کی بہتری کیلئے انتہائی متاثر کن اقدامات اٹھائے ہیں۔ اس موقع پر کنٹری ڈائریکٹر پاکستان اکیومن فنڈ فرخ خان، سیکرٹری خزانہ، وائس چیئرمین پنجاب ایجوکیشنل انڈومنٹ فنڈ ڈاکٹر امجد ثاقب اور وائس چیئرمین پنجاب سرمایہ کاری بورڈ سید مراتب علی بھی موجود تھے۔