پاکستان میں جب تک امن قائم نہیں ہوجاتا چین سے نہیں بیٹھیں گے ، حمزہ شہباز،امن کیلئے مذکرات سمیت تمام آپشنز بروئے کار لارہے ہیں، پاکستان کی ترقی امن کے ساتھ وابستہ ہے ،نوجوان ملک کا قیمتی سرمایہ ہیں جوعلم حاصل کر کے ملک کی تقدیر بدل سکتے ہیں، سیاست اور منزل صرف اور صرف عوام کی خدمت ہے ، تعلیم، صحت اور نوجوانوں کی بہبود حکومت کی اولین ترجیحات میں شامل ہے،راولپنڈی میں تقریب سے خطاب

راولپنڈی (اُردو پوائنٹ اخبار تازہ ترین۔15مارچ۔2014ء) رکن قومی اسمبلی حمزہ شہباز نے کہا ہے کہ پاکستان میں جب تک امن قائم نہیں ہوجاتا ہم چین سے نہیں بیٹھیں گے ۔ امن کیلئے مذکرات سمیت تمام آپشنز بروئے کار لارہے ہیں۔ پاکستان کی ترقی امن کے ساتھ وابستہ ہے ۔نوجوان ملک کا قیمتی سرمایہ ہیں جوعلم حاصل کر کے ملک کی تقدیر بدل سکتے ہیں ۔ ہماری سیاست اور منزل صرف اور صرف عوام کی خدمت ہے ۔

تعلیم، صحت اور نوجوانوں کی بہبود حکومت کی اولین ترجیحات میں شامل ہے ۔ وہ ہفتہ کی شام جناح انسٹی ٹیوٹ آف انفارمیٹکس اور راولپنڈی کالج آف کامرس کے تقسیم اسناد اور سالانہ کھیلوں کی تقسیم انعامات کی تقریب کے موقع پر مہمان خصوصی کی حیثیت سے خطاب کررہے تھے ۔ چیف ایگزیکٹو جناح انسٹی ٹیوٹ آف انفارمیٹکس اور راولپنڈی کالج آف کامرس کے چیف ایگزیکٹوپیرزادہ راحت قدوسی، جناح گروپ آف کالجز کے پرنسپل صاحبان مسعود سلطان چوہدری ، حامد محمود ، رضوان خان ، اساتذہ،طلباء و طالبات کے علاوہ ارکان قومی و صوبائی اسمبلی سینیٹر بیگم نجمہ حمید، ملک ابرار، محمد حنیف عباسی ، راجہ جاویداخلاص، بیگم طاہرہ اورنگزیب، بیگم سیما جیلانی ، سردار نسیم، آسیہ تنولی ، تحسین فواد ، زیب النساء ، ضیاء اللہ شاہ ، ثوبیہ انور ستی ، راجہ حنیف ایڈووکیٹ ، لبنی ریحان ، حافظ فاروق خٹک، حاجی پرویز خان ، چیئر مین بیت المال بیرسٹر عابد وحید شیخ ، مسلم لیگ (ن ) کے رہنماء اس موقع پر موجود تھے ۔

(جاری ہے)

حمزہ شہباز نے کہا کہ پاکستان مسلم لیگ ( ن ) نے ملک کو در پیش چیلنجوں کا مقابلہ کرنے اور ملک کو مسائل سے باہر نکالنے کا عزم کر رکھا ہے ۔ انہوں نے کہا کہ مادر وطن کی سلامتی اور تحفظ پاکستان مسلم لیگ ( ن ) کی حکومت کیلئے سب سے مقدم اور اہم ہے ۔ انہوں نے کہاکہ وفاق اور صوبے میں ہماری حکومت نے معیشت کو بحال کرنے کیلئے سخت فیصلے کئے ہیں اور معیشت میں بہتری کے اعشاریئے عوام کے سامنے ہیں ۔

حمزہ شہباز نے کہا کہ پاکستان کے صدر ممنون حسین ، وزیر اعظم محمد نواز شریف اور وزیر اعلی محمد شہباز شریف کے چین کے حالیہ دوروں کے نتیجے میں بڑی سرمایہ کاری کے امکانات پیدا ہوئے ہیں اور چین پاکستان میں تقریبا32 ۔ ارب ڈالر کی سرمایہ کاری کرے گا جو توانائی کے بحران کے حل اور معیشت کے دیگر شعبوں کی ترقی میں مدد گار ثابت ہوگی ۔ انہوں نے کہاکہ پنجاب حکومت نے جس طرح ذہین بچوں کی تعلیم کیلئے 10 ۔

ارب روپے کی خطیر رقم کا ایجوکیشن انڈوومنٹ فنڈ قائم کیاہے اسی طرح نوجوانوں کیلئے کھیلوں کی سہولتیں بالخصوص ہونہار غریب کھلاڑیوں کی مدد کیلئے دو ارب روپے سے سپورٹس انڈوومنٹ فنڈ بھی قائم کیاگیا ہے ۔ انہوں نے کہاکہ بے روزگار تعلیم یافتہ نوجوانوں کیلئے قرضے ، اعلی تعلیم کیلئے وظائف، کھلاڑیوں کی ترقی کیلئے انڈوومنٹ فنڈ سمیت نوجوانوں کی بہبود و ترقی پاکستان مسلم لیگ ( ن ) کا مین فوکس ہے ۔

انہوں نے کہاکہ گزشتہ سال کھیلوں میں 25 عالمی ریکارڈ قائم کئے گئے اور اس سال نوجوان کھیلوں کے مختلف شعبوں میں 40 عالمی ریکارڈ قائم کریں گے اور عالمی سطح پر ملک کا نام روشن کیا جائے گا ۔ حمزہ شہباز نے کہا کہ ڈالر کے مقابلے میں روپے کی قدر میں اضافہ عوام کے سامنے ہے اور جس طر ڈالر کو 108 روپے سے واپس نیچے لایا گیا ہے اسی طرح ملک میں بجلی اور گیس کے بحران کا خاتمہ کیا جائے گا اور ملک میں تین سال بعد توانائی کے اتنے وسائل موجود ہوں گے جو ملکی ضروریات پوری کرنے کے علاوہ وافر ہوں گے ۔

انہوں نے طلباء و طالبات پر زور دیا کہ وہ حصول علم کیلئے اپنی تمام ترتوانائیاں صرف کریں کیونکہ قوموں کی ترقی علم و تعلیم سے وابستہ ہے ۔ اس موقع پر حمزہ شہباز نے طلباء و طالبات میں ڈگریاں ، میڈلز اور انعامات تقسیم کئے ۔ جناح گروپ آف کالجز کے چیف ایگزیکٹو راحت قدوسی نے اس موقع پر اپنے تعلیمی اداروں کی نصابی اور ہم نصابی سرگرمیوں اور طلباء و طالبات اور اساتذہ کی نمایاں کامیابیوں کا ذکر کرتے ہوئے سپاسنامہ پیش کیا ۔