سندھ میں شوگر مل اونرز کی جانب سے شوگر ملیں چلانے بے جا تاخیر،کے کاشت کاروں نے گنے کی فصل احتجاجاََِ بطور چارا مویشیوں کو کھلانا شروع کر دی

پنگریو ( اُردو پوائنٹ تاز ترین اخبار۔ 8نومبر 2014ء) سندھ میں شوگر مل اونرز کی جانب سے شوگر ملیں چلانے میں کی جانے والی بے جا تاخیر کے بعد پنگریو سمیت زیریں سندھ کے کاشت کاروں نے گنے کی فصل احتجاجاََِ بطور چارا مویشیوں کو کھلانا شروع کر دی ہے کاشت کاروں نے کہا ہے کہ پندرہ ماہ تک گنے کی فصل کو اپنے بچوں کی طرح پالا ہے مگر شوگر مل اونرز ملیں چلانے میں مجرمانہ تاخیر کر رہے ہیں جس کی وجہ سے گندم کی بوائی کا سیزن گزرتا جا رہا ہے اب ہمارے پاس اس کے سوا کوئی راستہ نہیں بچا کہ ہم گنے کی فصل مویشیوں کے چارے کے طور پر استعمال کر کے یا گنا نذر آتش کر کے کھیت خالی کریں اور اس میں گندم کی بوائی کریں جو کہ ہمارے لئے پورے سال کے پیٹ گذر کے لئے بہت ضروری ہے ادھر کاشت کار تنظیموں نے بھی شوگر ملیں تا حال نہ چلائے جانے کے خلاف سخت احتجاج کیا ہے اور کہا ہے کہ شوگر ملیں نہ چلنے کے باعث سندھ میں لاکھوں کاشت کاروں کو گندم کی بوائی میں سخت مشکلات پیش آرہی ہیں اگر کاشت کار وں نے گندم کی بوائی نہ کی تو جہاں ایک طرف وہ سال کی گندم سے محروم رہیں گے وہیں پر حکومت کی جانب سے مقرر کردہ گندم کا ٹارگٹ بھی پورا نہیں ہو سکے گا تفصیلات کے مطابق سندھ میں شوگر کین ایکٹ کی سنگین خلاف ورزی کرتے ہوئے شوگر مل مالکان نے اب تک کرشنگ سیزن شروع نہیں کیا شوگر کین ایکٹ کے تحت شوگر ملیں یکم اکتوبر کو چلائی جانی ہو تی ہیں مگر سندھ کے شوگر مل اونرز نے نومبر کا پہلا عشرہ بھی گذر جانے کے باوجود اب تک اپنی ملیں نہیں چلائیں جس کی وجہ سے سندھ میں گندم کی بوائی متاثر ہو رہی ہے اور لاکھوں کاشت کار وقت پر گندم بوائی کر نے سے محروم ہیں اس صورتحال میں پنگریو اور زیریں سندھ کے دیگر علاقوں کے کاشت کاروں نے گنے کی فصل احتجاجی طور پر مویشیوں کے چارے کے لئے استعمال کرنا شروع کر دی ہے اور گنے کی فصل کٹائی کر نے کے بعد کتر مشینوں کے ذریعے مویشیوں کو چارے کے طور پر کھلائی جا رہی ہے گنے کی فصل چارے کے طور پر کٹائی کر نے والے پنگریو کے کاشت کاروں نے میڈیا کو بتایا کہ انہیں گنے کے بعد کھیتوں میں گندم کی بوائی کرنا ہے ہم نے شوگر ملیں چلنے کا انتظار کیا ہے تا کہ گنا شوگر ملوں کو سپلائی کر نے کے بعد کھیتوں میں گندم بوئیں مگر شوگر مل اونرز اپنی شوگر ملیں چلانے کے لئے تیار ہی نہیں ہیں اور آئیندہ ایک ماہ تک بھی شوگر ملیں چلنے کے کوئی آثار دکھائی نہیں دیتے اس لئے ہم گنے کی قیمتی فصل تلف کر رہے ہیں انہوں نے کہا کہ اگرچہ گنا تلف کرنے سے ہمیں بہت معاشی نقصان ہوا ہے مگر ہمارے لئے گندم کی فصل کی بوائی بہت اہم ہے اس لئے کہ ہم سارا سال اس گندم کا آٹا ہی کھائیں گے گندم خریدنا ہمارے بس کی بات نہیں گندم ہماری اور ہمارے بچوں کی پورے سال کی روز ی ہے اس لئے اس کی بوائی بہت ضروری ہے ان کاشت کاروں نے مزید کہا کہ شوگر ملیں وقت پر نہ چلنے سے ہمیں ناقابل تلافی نقصان ہوا ہے مگر حکومت اس معاملے پر گونگی اور بہری بنی ہوئی ہے جو کہ قبل مذمت عمل ہے اس ضمن میں کئے جانے والے سروے کے مطابق زیریں سندھ کے کافی علاقوں میں کاشت کار گنے کی فصل مویشیوں کے چارے میں استعمال کر نے کے لئے کٹائی کر رہے ہیں اور خالی ہو نے والی زمین پر گندم کی بوائی کر رہے ہیں دریں اثناء کاشت کار تنظیموں سندھ آبادگار بورڈ، سندھ آبادگار تنظیم، ایوان زراعت ، لاڑ آبادگار ایسوسی ایشن نے بھی سندھ میں کرشنگ سیزن کے آغاز میں کی جانے والی مصنوئی تاخیر کے خلاف سخت احتجاج کیا ہے اور کہا ہے کہ شوگر ملیں وقت پر نہ چلنے کے باعث کاشت کار گندم جیسی اہم فصل کی بوائی سے محروم ہیں کاشت کار تنظیموں نے کہا ہے کہ حکومت سندھ اور شوگر مل اونرز کی ملی بھگت سے کرشنگ سیزن کے آغاز میں ہو نے والی مجرمانہ تاخیر کے باعث سندھ کی جاں بہ لب زراعت کوناقابل تلافی نقصان ہو رہا ہے اور اس ملی بھگت و نقصان کے منفی اثرات سندھ اور ملک کے عوام پر بھی پڑیں گے