اہل سنت کی دس لاکھ مساجد میں امت مسلمہ اور عالم اسلام کے اتحاد کی ضرورت اور اہمیت کے موضوع پر خطبات جمعہ دئیے گئے

لاہور(اُردو پوائنٹ اخبار تازہ ترین۔10 اپریل۔2015ء ) سنی اتحاد کونسل کے زیر اہتمام ملک گیر ”یوم اتحاد عالم اسلام “منایا گیا ۔اس سلسلہ میں اہل سنت کی دس لاکھ مساجد میں امت مسلمہ اور عالم اسلام کے اتحاد کی ضرورت اور اہمیت کے موضوع پر خطبات جمعہ دئیے گئے ۔جبکہ جمعہ کے اجتماعات میں منظور کی گئیں قراردادوں کے ذریعے مطالبہ کیا گیا کہ پاکستانی فوج کو ہرگز یمن نہ بھیجاجائے ۔

قراردادوں میں مسلم حکمرانوں سے اپیل کی جائے گی کہ وہ لڑائیاں اور جنگیں چھوڑ کر مذاکرات سے باہمی تنازعات حل کریں ۔اور یمن کی صورتحال میں فریق بنے کی بجائے مصالحانہ کردار ادا کریں ۔جمعہ کے اجتماعات میں مشرق وسطی میں قیام امن اور اتحاد امت کیلئے خصوصی دعائیں بھی مانگی گئیں ۔یوم اتحاد عالم اسلام کے موقع پر چیئرمین سنی اتحاد کونسل صاحبزادہ حامد رضا نے جامعہ رضویہ میں جمعہ کے بڑے اجتماع سے خطاب کرتے ہوئے کہا ہے کہ یمن میں امن اتحاد امت سے ممکن ہے ۔

(جاری ہے)

امریکی اور اسرائیلی سازشوں کے مقابلے کیلئے اتحاد امت ناگزیز ہے ۔مسلمانوں کوفرقہ واریت کے نام پر لڑ اکر کمزور کیا جا رہا ہے ۔امریکی نیو ورلڈ آرڈر کے تحت مسلم ممالک میں خانہ جنگی کروائی جارہی ہے ۔مسلم دنیا میں منظم منصوبہ بندی سے انتشار اور فساد پھیلایا جا رہا ہے۔سنی اتحاد کونسل کے مرکزی ڈپٹی سیکریڑی جنرل طارق محبوب صدیقی نے کراچی میں خطاب کرتے ہوئے کہا مسلمان ایک دوسرے کا خون بہا کر امریکہ اور اسرائیل کے مقاصد پورے کر رہے ہیں ۔

مسلم حکمران جان لیں اامن ہی بہترین راستہ ہے۔عالم اسلام متحد ہو کرناقابل تسخیر قوت بن سکتا ہے ۔سنی اتحاد کونسل ضلع لاہور کے صدر مفتی محمد حسیب قادری نے المرکزالسلامی شاد باغ میں خطاب کرتے ہوئے کہا ہے کہ فرقہ کی بنیاد پر قتل و غارت کرنا امریکی ایجنڈ ہے۔شیعہ سنی کشیدگی کو ہوا دینے والے اسلام کے خیر خواہ نہیں ۔اتحاد امت ہی ترقی اور عروج کا راستہ ہے ۔

۔سنی اتحاد کونسل کے مرکزی ڈپٹی سیکریڑی اطلاعات ارشد مصطفائی نے چھانگا مانگا پارک کی الفیصل مسجد میں جمعہ کے بہت بڑے اجتماع سے خطاب کرتے ہوئے کہا اسلام عقیدے کی بنیاد پر کسی کے قتل کی اجازات نہیں دیتا ۔امریکہ مشرق وسطی میں فرقہ واریت کی آگ بھڑ کا رہا ہے ۔مسلم ممالک عالمی سطح پر متحد ہو کر مسلم بلاک تشکیل دیں اور اسلامی اقوام متحدہ کا اعلان کریں ۔

سنی اتحاد کونسل بلوچستان کے صدر مولانا وزیر القادری نے کوئٹہ میں خطاب کرتے ہوئے کہا عالم اسلام اپنے حقیقی دشمن امریکہ اور اسرائیل کے مقابلہ کیلئے متحد ہو جائے۔عالمی سازش کے مسلمانوں کو تقسیم کیا جارہا ہے ۔نازک وقت میں امت مسلمہ کو اتحاد کی ضرورت ہے ۔یوم اتحاد امت کے موقع پر فیصل آباد میں صاحبزادہ حسین رضا ۔پشاور میں مفتی فضل جمیل رضوی ۔گجرات میں صاحبزادہ مطلوب رضا۔گوجرانولہ میں مولانا محمد اکبر نقشبندی ۔چنیوٹ میں مولانا سیف سیالوی سمندری میں علامہ حامد سرفراز نے اجتماعات سے خطاب کیا۔