سی ای او سمیڈا سے جیولرز ایسوسی ایشن کے 15 رکنی وفد کی ملاقات، درپیش مسائل پر تبادلہ خیال

لاہور (اُردو پوائنٹ اخبارتازہ ترین - اے پی پی۔ 05 فروری2025ء) سمال اینڈ میڈیم انٹرپرائزز ڈیولپمنٹ اتھارٹی (سمیڈا) کے چیف ایگزیکٹو آفیسر (سی ای او) سکرات امان رانا سے جیولرز ایسوسی ایشن کے 15 رکنی وفد نے ملاقات کی -ترجمان کے مطابق لاہور ڈویژن صرافہ اور جیولرز ایسوسی ایشن (ایل ڈی ایس اینڈ جے اے) اور گولڈ اینڈ جیمز آرٹ پروموشن کونسل آف پاکستان (جی جی اے پی سی پی) کے 15 رکنی وفد سے کی قیادت محمد احمد نے کی۔

ملاقات میں کاروباری معاملات اور درپیش مسائل بارے تبادلہ خیال کیا گیا- سمیڈا) کے چیف ایگزیکٹو آفیسر (سی ای او) سکرات امان رانا نے وفد کو یقین دہانی کرائی ہے کہ سمیڈا ملک کے جیمز اور جیولری کے شعبے کو عالمی معیار کے مطابق جدید بنانے کے لیے تمام دستیاب وسائل استعمال کرے گا۔

(جاری ہے)

انہوں نے مزید کہا کہ سمیڈا اس شعبے کی ٹیکنیکی اور مالی مشاورت کے لیے ایسوسی ایشن کے ساتھ مل کر پروگرامز بھی تیار کرے گا۔

سکرات امان رانا نے وفد کو بتایا کہ موجودہ حکومت ایس ایم ایز کی ترقی کو گزشتہ حکومتوں سے زیادہ ترجیح دے رہی ہے۔ انہوں نے بتایا کہ صوبائی اور وفاقی سطح پر فنڈز مختص کیے گئے ہیں، جنہیں جیولرز اپنی ضروریات کو پورا کر کے حاصل کر سکتے ہیں۔ انہوں نے مزید کہا کہ سمیڈا ایسوسی ایشن کی سفارشات کی روشنی میں جیولرز کے لیے مختلف تربیتی پروگرامز اور آسان قرضہ اسکیموں کو جیمز اور جیولری کے شعبے کے لیے بھی عملی طور پر قابل عمل بنانے کے لیے بھرپور حمایت فراہم کرے گا۔

محمد احمد، چیئرمین لاہور ڈویژن صرافہ اینڈ جیولرز ایسوسی ایشن اور گولڈ اینڈ جیمز آرٹ پروموشن کونسل آف پاکستان کے صدر نے کہا کہ بھارت اپنے جیمز کی قیمت بڑھا کر اربوں ڈالر کما رہا ہے، جبکہ ہمارے ملک میں عالمی معیار کی کوئی لیب نہیں ہے، اور حکومت کو اس مسئلے پر توجہ دینی چاہیے۔اس پر سمیڈا کے سی ای او نے یقین دہانی کرائی کہ سمیڈا ایسوسی ایشن کو ایک بین الاقوامی معیار کی لیب کے قیام میں مکمل معاونت فراہم کرے گا۔

انہوں نے جیمز اور جیولری کے شعبے کی مقامی اور بین الاقوامی سطح پر مارکیٹنگ اور برانڈنگ کی فوری ضرورت پر بھی زور دیا، اور سمیڈا ایسوسی ایشن کے ساتھ مل کر اس سلسلے میں مختلف پروگرامز ترتیب دے گا۔اس موقع پر کونسل کے ڈائریکٹر اسٹریٹیجک ریسرچ اینڈ ای کامرس ونگ، ناصر عارف جنجوعہ نے سمیڈا کے سی ای او کو بتایا کہ کونسل نے جیمز اور جیولری کے شعبے کو ملکی ای کامرس مارکیٹ میں متعارف کرانے کا عمل شروع کر دیا ہے، جس کا پہلا پروگرام کامیابی کے ساتھ مکمل ہو چکا ہے۔سی ای او سمیڈا نے وفد کو بتایا کہ سمیڈا ایک جامع ای کامرس پروگرام تیار کر رہا ہے جو تمام شعبوں کے لیے قابل عمل ہوگا، اور جیمز اور جیولری کا شعبہ اس اقدام سے بھرپور فائدہ اٹھا سکتا ہے۔