چیف ایگزیکٹو ٹریڈ ڈویلپمنٹ اتھارٹی آف پاکستان کا لاہور چیمبر کا دورہ،تجارتی امور پر تبادلہ خیال

لاہور (اُردو پوائنٹ اخبارتازہ ترین - اے پی پی۔ 14 فروری2025ء) چیف ایگزیکٹو ٹریڈ ڈویلپمنٹ اتھارٹی آف پاکستان (ٹی ڈی اے پی ) فیض احمد چدھر کا لاہور چیمبر آف کامرس اینڈ انڈسٹری کا دورہ، جہاں ان کا استقبال چیمبر کے صدر ابوزر شاد نے کیا۔ملاقات میں لاہور چیمبر کی ایگزیکٹو باڈی اور ٹی ڈی اے پی کی ڈائریکٹر جنرل محترمہ رفیعہ سید بھی موجود تھیں۔ ملاقات کا مقصد پاکستان کی تجارت اور سرمایہ کاری کے فروغ کے لیے باہمی تعاون کو مستحکم کرنا تھا۔

صدر لاہور چیمبرابوزر شاد نے چیف ایگزیکٹو ٹی ڈی اے پی کو ان کے عہدے سنبھالنے پر مبارکباد دی اور امید ظاہر کی کہ ٹی ڈی اے پی اور لاہور چیمبر کے درمیان قریبی تعاون سے کاروباری برادری کو مزید سہولتیں فراہم کی جا سکیں گی۔ انہوں نے اس بات پر زور دیا کہ برآمدات کے فروغ اور عالمی منڈیوں میں پاکستان کے تجارتی مقام کو مستحکم کرنے میں ٹی ڈی اے پی کا کردار نہایت اہم ہے۔

(جاری ہے)

فیض احمد چدھر نے کہا کہ ٹی ڈی اے پی روایتی تجارتی تشہیر کے دائرہ کار سے آگے بڑھ کر ایک جامع تجارتی اور سرمایہ کاری کے فروغ کے ادارے میں تبدیل ہو رہا ہے۔ انہوں نے اس عزم کا اعادہ کیا کہ ٹی ڈی اے پی برآمد کنندگان کو درپیش اہم مسائل کے حل کے لیے کوشاں ہے، جن میں نمائش کنندگان اور خریداروں کے ویزا کے مسائل شامل ہیں، جو اکثر عالمی تجارتی میلوں میں شرکت میں رکاوٹ بنتے ہیں۔

انہوں نے اس بات پر بھی زور دیا کہ ٹی ڈی اے پی پاکستان کی برآمدات کو نئی منڈیوں خصوصا آسیان اور افریقہ میں وسعت دینے کے لیے فعال حکمت عملی اپنا رہا ہے، جہاں پاکستانی مصنوعات کے لیے بے پناہ مواقع موجود ہیں۔چیف ایگزیکٹو نے مزید کہا کہ ٹی ڈی اے پی صوبائی حکومتوں کے ساتھ قریبی روابط کے ذریعے ان ضوابط کو آسان بنانے کے لیے کام کر رہا ہے جو برآمد کنندگان کے لیے رکاوٹ کا سبب بنتے ہیں۔

انہوں نے خام مال پر ٹیرف اور سیلز ٹیکس میں کمی کی ضرورت پر بھی زور دیا تاکہ پاکستانی مصنوعات کو عالمی سطح پر مزید مسابقتی بنایا جا سکے۔ اس کے علاوہ انہوں نے انڈر انوائسنگ کے مسئلے کو ایک بڑا چیلنج قرار دیا اور کہا کہ اس کے حل کے لیے متعلقہ حکام کے ساتھ مل کر کام کیا جا رہا ہے تاکہ شفاف اور منصفانہ تجارتی عمل کو یقینی بنایا جا سکے۔

انہوں نے کہا کہ ٹی ڈی اے پی پاکستان کی زرعی، آئی ٹی، اور انجینئرنگ برآمدات کو فروغ دینے پر خصوصی توجہ دے رہا ہے، کیونکہ یہ شعبے ملکی معیشت میں کلیدی کردار ادا کرتے ہیں۔ انہوں نے کہا کہ ٹی ڈی اے پی، لاہور چیمبر اور دیگر شراکت داروں کے ساتھ مل کر ایک ایسا سازگار ماحول بنانے کے لیے پرعزم ہے جو برآمد کنندگان کے لیے کاروبار کو آسان بنائے اور بین الاقوامی شراکت داری کو فروغ دے۔خطاب کے بعد اجلاس میں سوال و جواب کا سیشن ہوا جہاں چیمبر کے ممبران نے مختلف تجارتی مسائل پر گفتگو کی اور ٹی ڈی اے پی کی آئندہ حکمت عملیوں پر تبادلہ خیال کیا۔