فیصل آباد چیمبر آف سمال ٹریڈرز اینڈ سمال انڈسٹری نے حالیہ وفاقی بجٹ کو یکسر مسترد کر دیا

فیصل آباد (اُردو پوائنٹ اخبارتازہ ترین - آن لائن۔ 14 جون2025ء)فیصل آباد چیمبر آف سمال ٹریڈرز اینڈ سمال انڈسٹری نے حالیہ وفاقی بجٹ کو یکسر مسترد کر دیا اور وزیراعظم محمد شہباز شریف اور وزیرخزانہ محمد اورنگزیب سے چھوٹے کاروباری افراد کو زیادہ سے زیادہ ریلیف دینے کا مطالبہ کر دیا‘ اس سلسلے میںفیصل آباد چیمبر آف سمال ٹریڈرز اینڈ سمال انڈسٹری میں ہنگامی اجلاس منعقد کیا گیا جس کی صدارت گروپ لیڈر میاں ظفر اقبال نے کی‘ اجلاس میں ایگزیکٹو ممبر شیخ محمد فیصل‘ کلاتھ بورڈ ایسوسی ایشن کے صدر سلطان بٹ‘ سینئر نائب صدر شیخ آصف‘ FCSTI کے سابق نائب صدر عادل شہزاد‘ ریلوے روڈ کے جنرل سیکرٹری آفتاب بٹ‘ تاجر رہنما عبدالرحمن مانی‘ میاں یوسف‘ شیخ تنویر‘ شیخ زین‘ شیخ خلیل احمد‘ شیخ محمد عدیل‘ محمد اکرام‘ محمد شبیر راجہ‘ شیخ احسان الٰہی دیگر دکانداروں نے شرکت کی‘اجلاس کے شرکاء سے خطاب کرتے ہوئے فیصل آباد چیمبر آف سمال ٹریڈرز اینڈ سمال انڈسٹری کے گروپ لیڈر میاں ظفراقبال‘ شیخ محمد فیصل‘ سلطان بٹ‘ شیخ آصف‘ عادل شہزاد و دیگر مقررین نے کہا کہ موجودہ وفاقی بجٹ میں چھوٹے تاجروں کیلئے کچھ نہیں ہے‘ یہ اشرافیہ کا بجٹ ہے‘ اگر یہ بجٹ منظور ہو گیا تو چھوٹے کاروباری افراد تباہ ہو جائیں گے‘ انہوں نے کہا کہ خسارے کا یہ بجٹ تاجروں کو کیا ریلیف دے گا‘ بجٹ میں لگائے گئے ہوشربا ٹیکسز سے لوکل انڈسٹری تباہ ہو جائے گی‘ بجٹ میں تجویز ہے کہ شک کی بنیاد پر کسی بھی فرم کے مالک کو گرفتار کیا جا سکے گا جو سراسر حراسمنٹ کے زمرے میں آتا ہے‘ ہوزری‘ ہیلتھ اور کپڑے کے کاروبار سے منسلک تاجر سخت مایوس نظر آ رہے ہیں‘ ان حالات میں کاروبار جاری رکھنا انتہائی مشکل ہو جائے گا اگر ہم اپنی دکانیں بند کر کے گھر بیٹھ گئے تو بیروزگاری میں مزید اضافہ ہو گا‘ لہٰذا ہمارا مطالبہ ہے کہ بجٹ میں چھوٹے تاجروں کو ریلیف پہنچانے کیلئے تجاویز رکھی جائیں‘ بجلی‘ گیس سستی کی جائے تاکہ چھوٹے تاجر بھی اطمینان سے اپنا کاروبار جاری رکھ سکیں۔