بلوچستان کے بارے میں قومی مفاہمتی کمیٹی کااجلاس، مسائل کے حل کیلئے بابر اعوان کو مسودہ تیار کر نے کی ہدایت ،صوبائی وزیر اعلیٰ کو تمام طبقوں سے رابطے کی ہدایت، حکومت کوئٹہ میں رات کو طیارے کی لینڈنگ کی سہولت فراہم کرے، کمیٹی کی سفارش

اسلام آباد(اُردو پوائنٹ اخبار تازہ ترین۔23اپریل۔2008ء) بلوچستان کے لئے قومی مفاہمتی کمیٹی کا پہلا اجلاس بدھ کے روز زرداری ہاؤس اسلام آباد میں پیپلز پارٹی کے شریک چیئرمین سینیٹر آصف علی زرداری کی صدارت میں منعقد ہوا۔ اس اجلاس میں اس کمیٹی کا نام \"شہید بے نظیر بھٹو کمیٹی برائے بلوچستان\" رکھنے کا فیصلہ کیا گیا اور سینیٹر ڈاکٹر بابر اعوان اس کمیٹی کے سیکریٹری جنرل نامزد کئے گئے۔

ڈاکٹر بابر اعوان کے ذمے یہ فرض سونپا گیا کہ بلوچستان کے دیرینہ مسائل کے حل کے لئے شہید محترمہ بینظیر بھٹو کے وژن کے مطابق ایک مسودہ تیار کریں۔اس اجلاس میں سینیٹ میں قائد ایوان سینیٹر میاں رضا ربانی وزارت داخلہ کے لئے وزیراعظم کے مشیر رحمن ملک، سینیٹر ڈاکٹر بابر اعوان، پیپلز پارٹی بلوچستان کے صدر میر لشکری رئیسانی، اراکین قومی اسمبلی، نبیل گبول اور اعجاز جاکھرانی اور پیپلز پارٹی بلوچستان کے ڈپٹی جنرل سیکریٹری سعدالله شاہ نے شرکت کی۔

(جاری ہے)

یہ اجلاس جو تقریباً چار گھنٹے تک جاری رہا میں صوبائی خودمختاری، قدرتی وسائل میں صوبے کا حصہ، اچھی حکمرانی، غربت کے خاتمے، سیاسی انتقامی کارروائیوں کے خاتمے، لاپتہ افراد کا پتہ لگانے، قانون کی حکمرانی جیسے امور پر غوروخوص کیا گیا۔ قومی مفاہمت کا مقصد حاصل کرنے کے لئے یہ فیصلہ کیا گیا کہ تمام سیاسی پارٹیوں اور تعلیمی ماہرین، دانشور، صحافیوں اور دیگر این جی اوز وغیرہ کو اعتماد میں لیا جائے گا۔

پارٹی کے صوبائی صدر میر لشکری رئیسانی کو یہ فرض سونپا گیا کہ وہ دانشوروں، صحافیوں، این جی اوز وغیرہ سے رابطہ کریں۔ بلوچستان کے مسائل کے حل کے لئے ایک ذیلی کمیٹی بلوچستان کے امور پر اپنی آراء دینے کے لئے اسلام آباد میں اپنا اجلاس منعقد کرے گی۔ مفاہمتی کمیٹی نے یہ فیصلہ بھی کیا کہ بلوچستان میں قومی تعمیر نو اور نو آبادکاری کے لئے تمام سیاسی پارٹیوں اور دیگر منسلک گروپوں کو اعتماد میں لیا جائے گا۔

اس ضمن میں یہ فیصلہ بھی کیا گیا کہ گوادر کے معاملے پر بھی ایک اجلا س منعقد کیا جائے گا تاکہ بلوچستان میں میگا پروجیکٹس کے متعلق خدشات کے بارے آگاہی حاصل کی جائے کمیٹی نے حکومت سے کہا کہ کوئٹہ ایئرپورٹ پر رات کو طیارہ اترنے کی سہولت مہیا کرنے کو ترجیح دی جائے۔ کمیٹی نے یہ خیال ظاہر کیا کہ اس بات کی اشد ضرورت ہے کہ پارلیمنٹ کے ذریعے بلوچستان کے مسائل کے حل کے لئے دیرپا پالیسی بنائی جائے اور اس ضمن میں سینیٹ جو کہ وفاقی اکائیوں کی نمائندگی کرتی ہے کے کردار کی اہمیت کو اجاگر کیا گیا۔

اجلاس نے کوئٹہ میں پروفیسر صفدر علی کیانی کے بیہمانہ قتل کی مذمت کی اور ان کی روح کے ایصالِ ثواب کے لئے فاتحہ پڑھی۔ اجلاس میں مرحوم کے غمزدہ خاندان سے ہمدردی کا اظہار بھی کیا۔ اجلاس میں یہ بات نوٹ کی گئی کہ جب ملک کی سب سے بڑی جمہوری سیاسی پارٹی نے مفاہمت کے لئے قدم آگے بڑھایا ہے تو کچھ عناصر اس کے خلاف سرگرم ہوگئے ہیں تاہم اجلاس میں اس عزم کا اظہار کیا گیا کہ وہ بلوچستان کے مسائل کے حل کے لئے قومی مفاہمت قائم کرنے کی کوششیں جاری رکھی جائیں گی۔