اگر صدر منتخب ہوئے تو متوسط طبقے کے خاندانوں کے اقتصادی خدشات سے نمٹیں گے، اوبامہ

واشنگٹن (اردوپوائنٹ اخبا ر تازہ ترین23اگست2008 )ڈیموکریٹک صدارتی امیدوار براک اوباما نے اپنی توجہ اقتصادی خدشات پر مرکوز رکھی اور اس سلسلے میں انہوں نے اس موضوع کو اٹھایا جوجان میکین کی دولت تھی جسے ڈیموکریٹ بہت اہم سمجھتے ہیں ۔ سینیٹر براک اوباما نے گزشتہ روز ورجینیا میں جان ٹیلر کمیونٹی کالج میں خطاب کرتے ہوئے انہوں نے کہا کہ اگر وہ صدر منتخب ہوگئے تو متوسط طبقے کے خاندانوں کے اقتصادی خدشات سے نمٹیں گے۔

اس کے بعد سینیٹر اوباما نے اپنے ری پبلکین مدمقابل سینیٹر جان میک کین کے اس انٹرویو میں دیے گئے ایک بیان پرگفتگو کی جو انہوں نے ایک سیاسی اخبار اور واشنگٹن میں قائم ایک ویب سائٹ کو دیا تھا۔ اوباما نے کہاکہ کسی نے جان میک کین سے پوچھا کہ آپ کے کتنے مکان ہیں تو انہوں نے کہا کہ مجھے ان کی تعداد کا علم نہیں ہے۔

(جاری ہے)

مجھے اپنے اسٹاف سے پوچھنا پڑے گا۔

اوباما نے کہا اب آپ سوچئے کہ اگر آپ یہ سمجھتے ہیں کہ امیر ہونے کا مطلب یہ ہے آپ 50 لاکھ ڈالر کمائیں، اور اگر آپ کو یہ معلوم نہیں ہے کہ آپ کے پاس مکانوں کی تعداد کیا ہے تو پھر یہ کوئی تعجب کی بات نہیں ہے کہ آپ یہ سمجھیں کہ ملک کی معیشت بنیادی طور پر مضبوط ہے۔ سینیٹر جان میک کین کی مہم میں جوابی طور پر کہاگیا ہے کہ سینیٹر میک کین اور ان کی اہلیہ سنڈی کے تین ریاستوں میں کم ازکم چار گھر ہیں۔

نیوز ویک میگزین نے حال ہی میں اندازہ لگایا تھا کہ سینیٹر میک کین اور ان کی رئیس اہلیہ کی کم ازکم سات املاک ہیں۔ سینیٹر میک کین کے ایک بیان میں یہ بھی نشان دہی کی گئی کہ سینیٹر اوباما نے پچھلے سال 40 لاکھ ڈالرسے زیادہ کمایا اور حال ہی میں انہوں نے ہوائی کے ایک نجی ساحلی تفریح گاہ میں تعطیلات گذاریں۔ سینیٹر میک کین صدارتی مہم سے چند دنوں کی رخصت لے رہے ہیں جب کہ سیاسی سرگرمیاں ڈیموکریٹک نیشنل کنونشن کی جانب منتقل ہورہی ہیں جو پیر کے روز سے ڈینور کولوریڈو میں شروع ہورہا ہے۔

سینیٹر میک کین کو ریاست منی سوٹا کے جڑواں شہروں،مناپلس او رسینٹ پال میں یکم ستمبر سے شروع ہونے والے ری پبلیکن پارٹی کے قومی کنونشن میں سرکاری طور پر نامزد کیا جائے گا۔ اس ہفتے اپنی صدارتی مہم کے دوران سینیٹر مکین نے عراق سے امریکی فوجیوں کے انخلا کے لیے نظام الاوقات متعین کرنے سے متعلق سینیٹر اوباما کے منصوبے پر اپنا اعتراض جاری رکھا۔ توقع ہے کہ دونوں امیدوار جلد ہی اپنے نائب صدارتی امیدوار ساتھیوں کے ناموں کا اعلان کریں گے۔ سینیٹر اوباما کے بارے میں توقع ہے کہ وہ ہفتے کے روز جب کہ سینیٹر جان مکین ڈیموکریٹک کنونشن کے بعد اس کا اعلان کریں گے۔