Khawab Main Kuch Ataa Hona - Islamic Khawab ki Tabeer

حضرت ابن سیرین رحمتہ اللہ تعالیٰ علیہ نے فرمایا ہے ۔ اگر خواب میں دیکھے کہ اس کو کوئی چیز بخشش میں ملی ہے ۔ معبر کو دریافت کرنا چاہئے کہ کس قسم کی بخشش ملی ہے ۔ سو نا یا چاندی یا کپڑا ہے ۔ اور بخشش دینے والا نا معلوم شخص ہے یا معلوم شخص ہے ۔مرد ہے یاعورت ۔ جب سب باتیں دریافت ہو جائیں تو تعبیر بیان کرے ۔ اگر وہ پسندیدہ چیز ہے تو اس کو خیر اور نیکی حاصل ہو گی ۔ اور اگر بخشش دینے والانا معلوم شخص ہے ۔ دلیل ہے کہ دنیا کی طرف سے اس کو ذلت ہو گی ۔ اور اگر عطاء خطاء کے وعدے پر ہے تو یہ سب جھوٹ ہے ۔ اور اگر دیکھے کہ عطالی ہے اور پھر واپس کی ہے ۔ دلیل ہے کہ اس کی نیکی اور بدی عطا دینے والے کی طرف رجوع کرے گی ۔ اور اگر دیکھے کہ اس کو میوہ یا کپڑا یا کوئی شیریں چیز بخشش میں ملی ہے دلیل ہے کہ اس کو اس شخص سے تعلق اور ملاپ حاصل ہو گی اور اگر بخشش دینے والا عیسائی یا یہودی ہے اور عمدہ اور اچھی بخشش ہے اور اس نے خواہش سے لی ہے ۔

(جاری ہے)

دلیل ہے کہ اس کا ایمان خطرے میں ہو گا ۔ اور اگر یہودی یا عیسائی خواب میں دیکھے کہ اس کو کسی مسلمان نے بخشش دی ہے اور اسے خواہش سے لی ہے ۔ دلیل ہے کہ مسلمان ہو گا ۔ حضرت ابراہیم کرمانی رحمتہ اللہ تعالیٰ علیہ نے فرمایا ہے ۔ اگر دیکھے کہ اس کو کسی نے بخشش دی ہے اور اس نے شکریہ ادا کیا ہے دلیل ہے کہ مال کی زیادتی اور تندرستی ہو گی ۔ اور اگر شکریہ ادا نہیں کیا ہے تو تاویل خلاف ہے ۔ حضرت جابر مغربی رحمتہ اللہ تعالیٰ علیہ نے فرمایا ہے ۔ اگر دیکھے کہ بخشش کوئی اچھی چیز ہے اور بخشش دینے والا کوئی کمینہ شخص ہے تو اس کی تاویل بری ہے ۔