بھارت میں طلبہ کو نقل سے روکنے کیلئے انوکھا طریقہ کی ویڈیو سوشل میڈیا پر وائرل

بوزیر تعلیم یونیورسٹی حکام پر برہم ،طریقہ کار پر حکام سے معافی مانگنے کا مطالبہ

اتوار 20 اکتوبر 2019 19:30

بھارت میں طلبہ کو نقل سے روکنے کیلئے انوکھا طریقہ کی ویڈیو سوشل میڈیا پر وائرل

: نئی دہلی (اُردو پوائنٹ اخبارتازہ ترین - آن لائن۔ 20 اکتوبر2019ء) بھارتی ریاست کرناٹکا کے شہر بنگلورو میں طلباء کو نقل کرنے سے روکنے کے لیے سر پر گتے پہنا کر امتحان لیا گیا جس کے سوشل میڈیا پر خوب چرچے کیے جا رہے ہیں۔بھارتی میڈیا رپورٹ کے مطابق رواں ہفتے بنگلورو کی ایک یونیورسٹی میں طلبائ کو نقل سے روکنے کے لیے سر پر گتے پہنا کر امتحان لیا گیا جس کی تصاویر سوشل میڈیا پر وائرل ہو گئیں۔

تصاویر میں دیکھا جاسکتا ہے کہ تمام طلبہ اور طالبات ہیلمٹ کی طرح گتے سے سر کو ڈھانپے امتحان دے رہے ہیں، اس دوران صرف آنکھوں والے حصے سے وہ دیکھ سکتے ہیں۔

سوشل میڈیا پر تصاویر وائرل ہونے کے بعد یونیورسٹی حکام کو شدید تنقید کا نشانہ بنایا گیا اور کہا کہ یہ طلباء ہیں جانور نہیں۔

(جاری ہے)

اس عمل کو کرناٹکا کے تعلیمی وزیر نے بھی ناقابل برداشت قرار دیا اور کہا کہ امتحانات میں طلباء کا نقل کرنا ایک مسئلہ ہے لیکن اس کو حل کرنے کے لیے یہ رویہ اختیار کرنا بالکل مناسب نہیں ہے، جس کسی نے بھی اس طریقے کی اجازت دی ہے اسے اپنی غلطی تسلیم کرنی چاہیے۔

دوسری جانب یونیورسٹی کے سربراہ نے گتوں کے ذریعے نقل روکنے کے طریقے پر وضاحت دی کہ ہمارے اس اقدام کو سوشل میڈیا پر سراہا جا رہا ہے، یہ طلبائ کی بہتری کے لیے ہے کیونکہ ہم نہیں چاہتے کے دوران امتحان طلبائ کا ذہن کہیں بھی بھٹکے اس لیے توجہ برقرار رکھنے کے لیے صرف آنکھوں والا حصہ کھولے رکھا گیا۔انہوں نے مزید کہا کہ یہ ایک نیا تجربہ تھا جس پر مثبت اور منفی دونوں اقسام کے ردعمل سامنے آئے۔