قطر نے پاکستانی پاسپورٹ رکھنے والوںکیلئے آمد پر ویزا کی سہولت متعارف کرا دی

دوحہ (اُردو پوائنٹ اخبارتازہ ترین - آئی این پی۔ 31 اگست2017ء) قطر نے پاکستانی پاسپورٹ رکھنے والوں کے لیے آمد پر ویزا کی سہولت متعارف کرا دی۔قطر کی سب سے بڑی ایئرلائن قطر ایئرویز کی ویب سائٹ کے ویزے سے متعلق معلومات کے پیج پر لکھا گیا کہ نئے قوانین کے مطابق اب پاکستانی شہری آمد پر 30 روز تک کا ویزا حاصل کر سکتے ہیں، جبکہ وہ ویزے میں 30 روز کی توسیع کی درخواست بھی کر سکتے ہیں۔

تاہم ویزے کے حصول کے لیے شہری کے پاسپورٹ کی مدت میعاد ختم ہونے میں، قطر پہنچنے کی تاریخ سے، کم از کم چھ ماہ باقی ہونا اور ایئر ٹکٹ ہونا لازمی ہے، جس سے واضح ہوسکے کہ آنے والا شہری ملک چھوڑ دے گا۔واضح رہے کہ قطر ایئرویز ملک کی سرکاری اور قومی ایئرلائن ہے۔فی الوقت یہ واضح نہیں ہوسکا کہ قطری انتظامیہ پاکستانی شہریوں کے لیے قوانین میں یہ تبدیلی کب کی۔

(جاری ہے)

رواں ماہ کے اوائل میں قطر نے فضائی نقل و حمل اور سیاحت کو فروغ دینے کے لیے 80 ممالک کے لیے ویزا کی پابندی ختم کردی تھی۔قطری محکمہ سیاحت کے عہدیدار حسن الابراہیم نے دوحہ میں پریس کانفرنس کرتے ہوئے بتایا کہ قطر میں داخلے کے لیے ویزا کی پابندی ختم کرنے کا مقصد اسے پوری دنیا کے لیے اس خطے کا ایک کھلا ہوا ملک بنانا ہے۔قطری وزارت داخلہ کے عہدیدار رشید المزروئی نے کہا کہ 80 ممالک کے شہری صرف اپنا درست پاسپورٹ دکھا کر ملک میں داخلے کی اجازت لے سکتے ہیں۔قطر ایئرویز کے سربراہ اکبر البقر کا کہنا تھا کہ ان کا ادارہ دنیا میں مزید 62 منازل قائم کرنے کا ارادہ رکھتا ہے اور اس حکومتی منصوبے سے ایئرلائن کو سب سے زیادہ منافع حاصل ہوگا۔