سعودی عرب: غسلِ کعبہ کی سالانہ رسم آج ادا کی جا رہی ہے

غسل کعبہ کی رسم گورنر مکہ شہزادہ خالد الفیصل سعودی فرمانروا شاہ سلمان بن عبدالعزیز کی نیابت میں انجام دیں گے

Muhammad Irfan محمد عرفان پیر ستمبر 10:49

سعودی عرب: غسلِ کعبہ کی سالانہ رسم آج ادا کی جا رہی ہے
مکہ مکرمہ(اُردو پوائنٹ اخبارتازہ ترین،16ستمبر 2019ء) غسلِ کعبہ کی مبارک رسم آج خانہ کعبہ میں ادا کی جائے گی۔ غسلِ کعبہ کی رسم گورنر مکہ شہزادہ خالد الفیصل، خادم حرمین شریفین سعودی فرمانروا شاہ سلمان بن عبدالعزیز کی نیابت میں انجام دیں گے۔ اس رسم کی ادائیگی کے وقت مکہ کے نا ئب گورنر شہزادہ بدر بن سلطان، مسجد الحرام اور مسجد نبوی انتظامیہ کے سربراہ شیخ ڈاکٹر عبدلرحمان السدیس، سعودی عرب میں متعین مسلم سفارتکار، ممتاز علماء، وزرا، کلید برداران کعبہ اور مقامی شہری شریک ہوں گے۔

اس موقع پر کعبہ کو عرقِ گلاب سے معطر آب زم زم سے غسل دیا جائے گا اور اس کی اندرونی دیواروں کو بھی معطر پانی سے دھویا جائے گا۔ سبق نیوز ویب سائٹ کے مطابق حرمین شریفین کی انتظامیہ کے سربراہ شیخ ڈاکٹر عبدالرحمن السدیس نے بتایا ہے کہ خانہ کعبہ کو غسل دینے کی یہ رسم سعودی مملکت کے بانی شاہ عبدالعزیز کے دور میں شروع کی گئی تھی، بعد میں تمام سعودی فرمانروا اس مبارک رسم کو نبھاتے رہے اور اب موجودہ دور میں شاہ سلمان بن عبدالعزیز اورولی عہد شہزادہ محمد بن سلمان بھی اس رسم کو ادا کر رہے ہیں۔

(جاری ہے)

شروع شروع میں خانہ کعبہ کو غسل دینے کی رسم سال میں دو مرتبہ یکم شعبان اور پھر محرم میں ادا کی جاتی تھی۔ تاہم اب یہ رسم سال میں صرف ایک مرتبہ 15 محرم الحرام کو ادا کی جاتی ہے۔ غسلِ کعبہ کا منظر بہت رُوح پرور ہوتا ہے، اس موقع پر اہم سعودی شخصیات کے علاوہ دیگر ممالک کے مسلمان سفیروں کی بھی بڑی تعداد شرکت کرتی ہے۔

مکہ مکرمہ میں شائع ہونے والی مزید خبریں:

Your Thoughts and Comments