رمضان المبارک کے تیسرے عشرے کے آغاز پر مسجد الحرام سمیت کئی سعودی شہروں میں موسلادھار بارش

مکہ مکرمہ، جدہ سمیت کئی سعودی علاقوں میں کئی گھنٹوں سے جاری مسلسل بارش کے باعث ریڈ الرٹ جاری کر دیا گیا

محمد علی جمعرات 20 مارچ 2025 22:48

مکہ مکرمہ (اُردو پوائنٹ اخبارتازہ ترین۔ 20 مارچ2025ء) رمضان المبارک کے تیسرے عشرے کے آغاز پر مسجد الحرام سمیت کئی سعودی شہروں میں موسلادھار بارش، مکہ مکرمہ، جدہ سمیت کئی سعودی علاقوں میں کئی گھنٹوں سے جاری مسلسل بارش کے باعث ریڈ الرٹ جاری کر دیا گیا۔ تفصیلات کے مطابق عین رمضان المبارک کے تیسرے عشرے کے آغاز پر سعودی عرب کے کئی علاقوں میں موسلادھار بارشوں کا سلسلہ شروع ہو گیا۔

سعودی محکمہ موسمیات کی جانب سے بتایا گیا ہے کہ جمعرات کے روز مکہ مکرمہ سمیت جدہ کے جنوبی اور مشرقی علاقوں میں موسلادھار بارش ہوئی، جس کے بعد دونوں سعودی شہروں کے لیے ریڈ الرٹ جاری کردیا گیا۔ سعودی میڈیا کے مطابق مکہ مکرمہ اور جدہ میں مسلسل جاری رہنے والی بارش کے باعث میونسپلٹی، ہلال احمر، محکمہ ٹریفک اور دیگر امدادی اداروں نے ہنگامی حالات کا نفاذ کردیا ہے۔

(جاری ہے)

جمعرات کے روز مکہ مکرمہ کے بیشتر علاقوں کے علاوہ مسجد الحرام میں موسلادھار بارش ہوئی، محکمہ موسمیات کی پیشگوئی کے مطابق مکہ مکرمہ میں مزید بارش کا امکان ہے۔ جمعرات کو جدہ میں بھی عزیزیہ، مشرفہ، بنی مالک اور شہر کے جنوبی اور اور مشرقی علاقوں میں صبح سے وقفے وقفے سے بارش کا سلسلہ جاری رہا۔ جبکہ شمالی اور وسطی محلوں میں کہیں کہیں ہلکی بارش ہوئی۔

جمعرات کی شام تک جدہ میں مطلع ابر آلود رہا اور گرج چمک کا سلسلہ بھی جاری رہا۔ مسلسل بارش کی اس صورتحال میں جدہ میونسپلٹی کے مطابق کسی بھی ہنگامی حالت سے نمٹنے کے لیے تیاریاں مکمل کرلی گئی ہیں جبکہ پانی صاف کرنے کی گاڑیوں کے علاوہ اضافی نفری تعینات کردی گئی ہے۔ سعودی میڈیا کے مطابق جمعرات کے روز مکہ مکرمہ میں بارش کے دوران مسجد الحرام میں زائرین کا طواف جاری رہا۔ رمضان المبارک کے تیسرے عشرے کے آغاز پر مکہ مکرمہ میں موسلادھار بارش کے باوجود جمعہ کی نماز کی ادائیگی کیلئے لاکھوں زائرین مکہ مکرمہ پہنچ گئے ہیں۔