پاکستان و سعودی عرب کا معیشت، تجارت، سرمایہ کاری کے فروغ پر اتفاق

نیویارک ( اُردو پوائنٹ اخبارتازہ ترین ۔ 20 ستمبر2023ء ) نگران وزیر خارجہ جلیل عباس جیلانی اور ان کے سعودی ہم منصب شہزادہ فیصل بن فرحان السعود کے درمیان اقوام متحدہ کی جنرل اسمبلی کے 78ویں اجلاس کے موقع پر ملاقات ہوئی، جس میں دونوں وزرائے خارجہ نے پاک سعودی تعلقات کی اہمیت پر زور دیتے ہوئے تمام شعبوں بالخصوص معیشت، تجارت، توانائی اور سرمایہ کاری میں باہمی تعاون کے فروغ پر اتفاق کیا۔

تفصیلات کے مطابق ملاقات میں دونوں وزرائے خارجہ نے دوطرفہ تعلقات کے مختلف پہلوؤں کے ساتھ ساتھ باہمی دلچسپی کے علاقائی اور عالمی امور پر تبادلہ خیال کیا، وزیر خارجہ نے سعودی قیادت کا پاکستان کی فراخدلانہ اور غیر متزلزل حمایت پر شکریہ ادا کیا، انہوں نے سعودی وزیر خارجہ کو خصوصی سرمایہ کاری سہولت کونسل ( ایس آئی ایف سی ) کی تشکیل سے آگاہ کیا تاکہ جی سی سی کے رکن ممالک بالخصوص مملکت سعودی عرب کی ممکنہ سرمایہ کاری کو آسان اور تیز تر بنایا جا سکے، جلیل عباس جیلانی نے اس بات پر زور دیا کہ آئی ٹی، انرجی، انفراسٹرکچر اور لیبر سمیت اہم شعبوں میں پاک سعودی تعاون کو بڑھایا جانا چاہیے۔

(جاری ہے)

وزیر خارجہ نے 20 لاکھ سے زائد تارکین وطن پاکستانیوں کی میزبانی پر سعودی ہم منصب کا شکریہ ادا کیا، انہوں نے اس بات کا اعادہ کیا کہ پاکستان سعودی ولی عہد اور سعودی مملکت کے وزیراعظم کے دورہ پاکستان کا بے تابی سے منتظر ہے، پاکستان اور سعودی عرب برادرانہ تعلقات میں جُڑے ہیں جو باہمی اعتماد اور افہام و تفہیم، قریبی تعاون اور ایک دوسرے کا ساتھ دینے کی مستقل روایت پر مبنی ہیں۔

بتایا گیا ہے کہ پاکستان اور سعودی وزرائے خارجہ کی ملاقات میں امریکہ میں سعودی سفیر شہزادی ریما بنت بندر بن سلطان، اقوام متحدہ میں مستقل سعودی مندوب ڈاکٹر عبداالعزیز الواصل اور وزارت خارجہ آفس کے ڈائریکٹر عبدالرحمن الداود بھی موجود تھے، اس موقع پر شہزادہ فیصل بن فرحان آل سعود نے دونوں ممالک کے درمیان برادرانہ تعلقات اور مملکت کی ترقی میں پاکستانی کمیونٹی کے گراں قدر کردار پر روشنی ڈالی۔