سعودیہ کا عرب خطے میں منشیات کے اضافے پر سخت تشویش کا اظہار

نیویارک ( اُردو پوائنٹ اخبارتازہ ترین ۔ 20 ستمبر 2023ء ) سعودی عرب نے خطے میں منشیات کے اضافے پر سخت تشویش کا اظہار کرتے ہوئے ان خطرات کا مقابلہ کرنے کیلئے بین الاقوامی تعاون بڑھانے کی خواہش ظاہر کردی۔ العربیہ نیوز کے مطابق نیویارک میں اقوام متحدہ کی جنرل اسمبلی کے اجلاس میں شرکت کے موقع پر سائیڈ لائن میں ہونے والی ایک تقریب میں اظہار خیال کرتے ہوئے سعودی عرب کے وزیر خارجہ فیصل بن فرحان نے کہا کہ ہمارے خطے میں مصنوعی طور پر تیار ہونے والی نشہ آور اشیاء میں شدید اضافہ دیکھا گیا ہے، کئی مملک میں غیر محفوظ اور غیر مستحکم حالات میں انتہائی تیزی سے میتھ ایمفیٹامین کی تیار ہو رہی ہے، ہمارے معاشروں پر اس کے انتہائی خطرناک اثرات مرتب ہو رہے ہیں جس کے باعث ہم اس جانب متوجہ ہو رہے ہیں۔

(جاری ہے)

شہزادہ فیصل بن فرحان نے بتایا کہ سعودی عرب منصوعی نشہ آور مواد کے غیر طبی استعمال سے متعلق رجحانات کے صحت عامہ اور معاشرے پر پڑنے والے منفی اثرات کے بارے میں فکر مند ہے، اس لیے ہم اس معاملے سے متعلق چیلجنز، نشہ آور اشیاء کی غیر قانونی تیاری، نقل وحمل اور ان کے نتیجے میں رونما ہونے والے جرائم کا خاتمہ کرنے کی سر توڑ کوشش کر رہے ہیں۔

بتایا گیا ہے کہ اس موقع پر سعودی وزیر خارجہ نے منشیات کی اس لعنت کا مقابلہ کرنے کے لیے حکومتوں اور بین الاقوامی سٹیک ہولڈرز کے درمیان باہمی تعاون پر مبنی کوششوں کو فروغ دینے کی ضرورت پر زور دیا، انہوں نے امریکی ہم منصب انٹونی بلینکن کے کردار کو سراہا جو ان کی جانب سے صحت عامہ اور مصنوعی نشہ آور اشیاء سے پیدا ہونے والے خطرات کا مقابلہ کرنے کی خاطر تشکیل دیئے جانے والے بین الاقوامی تعاون اور اتحاد کی صورت میں ادا کیا جا رہا ہے۔