مخصوص شعبے کے ہزاروں افراد کو امارات کے گولڈن ویزے جاری

گولڈن ویزہ دس سال کا رہائشی پرمٹ ہے جو نمایاں کارکردگی دکھانے والوں کو دیا جاتا ہے

اتوار 2 مارچ 2025 14:00

مخصوص شعبے کے ہزاروں افراد کو امارات کے گولڈن ویزے جاری

ابوظہبی (اُردو پوائنٹ اخبارتازہ ترین - این این آئی۔ 02 مارچ2025ء) متحدہ عرب امارات کی حکومت نے تعلیم کے شعبے میں نمایاں کارکردگی دکھانے پر 16 ہزار 456 افراد کو گولڈن ویزے جاری کردیئے۔ اماراتی میڈیا کے مطابق گولڈن ویزہ دس سال کا رہائشی پرمٹ ہے جو نمایاں کارکردگی دکھانے والوں کو دیا جاتا ہے، یو اے ای کا گولڈن ویزہ حاصل کرنے والوں میں 10 ہزار 710 ہائی سکول کے بہترین طلبہ بھی شامل ہیں جنہوں نے اپنے امتحانات میں 95 فیصد سے زائد نمبرز حاصل کیے۔

(جاری ہے)

بتایا گیا ہے کہ اماراتی حکومت نے 5 ہزار 246 نمایاں یونیورسٹی گریجویٹس کو گولڈن ویزے جاری کیے ہیں جب کہ 337 تعلیمی ماہرین کو بھی گولڈن ویزہ دیا گیا ہے، عالمی سطح پر تسلیم شدہ یونیورسٹیوں کے 147 گریجویٹس کو بھی گولڈن ویزہ دیا گیا ہے، اس کے علاوہ خلیجی ملک کی جانب سے 16 نمایاں سائنسدانوں کو بھی گولڈن ویزے دیئے گئے ہیں۔ اس حوالے سے ابوظہبی میں امیگریشن حکام کا کہنا تھا کہ گولڈن ویزہ پروگرام کا مقصد عالمی ٹیلنٹ کو متحدہ عرب امارات میں مستقل رہائش فراہم کرنا ہے تاکہ گولڈن ویزہ رکھنے والے افراد تعلیم کے شعبے کی ترقی میں اہم کردار ادا کرسکیں۔