پاکستان یا کسی اور ملک سے متحدہ عرب امارات آنے کے خواہشمندوں کیلئے خوشخبری

میزبان یا اسپانسر کے بغیر ٹورسٹ اور وزٹ ویزا سمیت مختلف پرمٹس پر یو اے ای میں داخلے کی تفصیلات سامنے آگئیں

ساجد علی منگل 16 اگست 2022 15:24

پاکستان یا کسی اور ملک سے متحدہ عرب امارات آنے کے خواہشمندوں کیلئے خوشخبری

دبئی ( اُردو پوائنٹ اخبارتازہ ترین ۔ 16 اگست 2022ء ) پاکستان یا دنیا کے کسی بھی اور ملک سے متحدہ عرب امارات آنے کے خواہشمندوں کے لیے خوشخبری ہے کہ میزبان یا اسپانسر کی ضرورت کے بغیر ٹورسٹ اور وزٹ ویزا سمیت مختلف پرمٹس پر یو اے ای میں داخلے کی تفصیلات سامنے آگئیں۔ تفصیلات کے مطابق متحدہ عرب امارات کی جانب سے نئی رہائشی اصلاحات کے تحت یو اے ای داخلے کے 7 اجازت ناموں سمیت ٹورسٹ ویزا میں بھی تبدیلی کی گئی ہے، نیا نظام میزبان یا اسپانسر کی ضرورت کے بغیر مختلف قسم کے اجازت نامے پیش کرتا ہے، یو اے ای کے داخلے کے اجازت نامے اور ویزا کے نظام کو تبدیل کرنے کے فیصلے کے حصے کے طور پر متعارف کرائی گئی کچھ نئی تبدیلیاں اگلے ماہ سے نافذ العمل ہوں گی۔

معلوم ہوا ہے کہ نیا نظام امارات آنے والوں کو پہلی بار کسی میزبان یا کفیل کی ضرورت کے بغیر وزٹ مقاصد کے لیے مختلف اقسام کے ویزا فراہم کرتا ہے، یہ ویزے لچکدار مدت پیش کرتے ہیں جو یو اے آئی آنے والوں کی ضروریات اور ان کے دورے کے مقصد کو پورا کرتے ہیں، یہ نئے داخلے کے اجازت نامے غیر ملکیوں کے لیے مختلف قسم کے ویزوں کے لیے درخواست دینے کا دائرہ وسیع کریں گے تاکہ متحدہ عرب امارات کو ایک پرکشش سیاحتی مقام کے طور پر پیش کیا جائے، داخلے کے اجازت ناموں اور سیاحتی ویزا کی تبدیلیوں کی فہرست درج ذیل ہے؛

>>> وزٹ ویزا

ستمبر 2022 سے متحدہ عرب امارات کے دورے کے لیے دستیاب یہ وزٹ ویزا اب 30 دن کی بجائے 60 دن کے قیام کی اجازت دے گا۔

(جاری ہے)

>>> ملٹی انٹری ٹورسٹ ویزا

متحدہ عرب امارات میں سیاحتی اداروں کی طرف سے سپانسر کیے جانے والے باقاعدہ سیاحتی ویزا کے علاوہ ایک 5 سال کا ملٹی انٹری ٹورسٹ ویزا متعارف کرایا گیا ہے، داخلے کا یہ اجازت نامہ سیاحوں کو متحدہ عرب امارات کو مزید گہرائی سے دیکھنے کا موقع ملے گا، اس نئے ویزے میں اسپانسر کی ضرورت نہیں ہوگی تاہم اس ویزا کو حاصل کرنے کے لیے درخواست گزار کے پاس درخواست دینے سے پہلے 6 ماہ کے دوران 4 ہزار ڈالر یا دوسری کرنسی میں اس کے مساوی رقم کا بینک بیلنس ہونا چاہیے، اس ویزا کے حامل لوگ متحدہ عرب امارات میں لگاتار 90 دن قیام کر سکتے ہیں جس کے لیے شرط صرف یہ ہے کہ قیام ایک سال میں لگاتار 180 دن سے زیادہ نہیں ہونا چاہیے۔

>>> جاب ایکسپلوریشن انٹری ویزا

اس ویزا کے لیے اسپانسر یا میزبان کی ضرورت نہیں ہے، یہ ان لوگوں کو دیا جاتا ہے جو پہلی یا دوسری یا تیسری مہارت کے درجے میں منسٹری آف ہیومن ریسورسز اینڈ ایمریٹائزیشن کی درجہ بندی میں آتے ہوں، دنیا کی بہترین 500 یونیورسٹیوں کے تازہ گریجویٹس ہوں جن کی کم از کم تعلیمی سطح بیچلر ڈگری یا اس کے مساوی ہونی چاہیے۔

>>> بزنس انٹری ویزا

اس انٹری پرمٹ کے لیے بھی کسی اسپانسر یا میزبان کی ضرورت نہیں ہوتی اس کا مقصد سرمایہ کاروں اور کاروباری افراد کو متحدہ عرب امارات میں کاروبار اور سرمایہ کاری کے مواقع تلاش کرنے کی ترغیب دینا ہے۔

>>> رشتہ داروں یا دوستوں سے ملنے کے لیے داخلے کا اجازت نامہ

موجودہ ترمیم کے مطابق کوئی وزیٹر اس انٹری پرمٹ کے لیے درخواست دے سکتا ہے اگر وہ متحدہ عرب امارات کے شہری یا رہائشی کا رشتہ دار یا دوست ہے، اس کے لیے اسپانسر یا میزبان کی ضرورت نہیں ہے۔

>>> مطالعہ اور تربیت کے لیے داخلے کا اجازت نامہ

یہ اجازت نامہ ان لوگوں کے لیے ہے جو تربیت اور مطالعہ کے کورسز میں شرکت کر رہے ہیں یا انٹرنشپ پروگراموں میں حصہ لے رہے ہیں، اس کے لیے اسپانسر ملک میں لائسنس یافتہ یونیورسٹیاں، تعلیمی یا تحقیقی ادارے یا دیگر سرکاری و نجی ادارے ہو سکتے ہیں، اس کے لیے ادارے کی طرف سے ایک خط درکار ہوتا ہے، جس میں مطالعہ یا تربیت یا انٹرنشپ پروگرام اور اس کی مدت کی تفصیلات واضح ہوں۔

>>> عارضی کام کے مشن کے لیے داخلے کا اجازت نامہ

یہ اجازت نامہ ان لوگوں کے لیے ہے جن کے پاس عارضی کام کی تفویض جیسے پروبیشن ٹیسٹنگ یا پروجیکٹ پر مبنی مشن ہے، یہ ویزا آجر کی طرف سے سپانسر کیا جاتا ہے، اس کے لیے کام کا عارضی معاہدہ یا آجر کا ایک خط درکار ہوتا ہے جس میں دورے کا مقصد اور کام کرنے کے لیے صحت اور تندرستی کے ثبوت کی وضاحت کی گئی ہو۔