شیخ محمد کا دبئی میں پبلک بیچز میں 5 گنا اضافے کا اعلان

ہم دبئی کی انفرادیت کو برقرار رکھیں گے جس کا نام کامیابی اور ناممکن کو حاصل کرنے سے وابستہ ہے۔ دبئی کے حکمران کا پیغام

ساجد علی جمعرات 25 مئی 2023 15:49

شیخ محمد کا دبئی میں پبلک بیچز میں 5 گنا اضافے کا اعلان

دبئی ( اُردو پوائنٹ اخبارتازہ ترین ۔ 25 مئی 2023ء ) متحدہ عرب امارات کے نائب صدر اور وزیر اعظم اور دبئی کے حکمران شیخ محمد بن راشد المکتوم نے اعلان کیا ہے کہ دبئی اپنے عوامی ساحلوں میں 5 گنا اضافہ کرے گا۔ تفصیلات کے مطابق شیخ محمد بن راشد آل مکتوم نے عوامی ساحلوں کی لمبائی کو 400 فیصد تک ترقی دینے کے لیے دبئی اربن پلان کی منظوری دے دی، جس کے بعد اس کا رقبہ 21 کلومیٹر سے بڑھا کر 105 کلومیٹر ہو جائے گا۔

سماجی رابطوں کی ویب سائٹ ٹوئٹر پر اپنے آفیشل اکاؤنٹ سے جاری بیان میں دبئی کے حکمران نے بتایا کہ دبئی کے شہری منصوبے کے ایک حصے کے طور پر ہم نے 2040ء تک عوامی ساحلوں کی طوالت کو 400 فیصد تک ترقی دینے کی منظوری دی ہے، اس کے نتیجے میں ساحلوں کا رقبہ جو اس وقت 21 کلومیٹر ہے، اس سے بڑھا کر 105 کلومیٹر کر دیا جائے گا، ہمارا مقصد 2025 تک عوامی ساحلوں پر پیش کی جانے والی خدمات کو 300 فیصد تک بڑھانا ہے۔

(جاری ہے)

شیخ محمد بن راشد آل مکتوم نے کہا کہ ہم نے دبئی میں پہلا شہری منصوبہ 1960ء میں شروع کیا تھا، دبئی میں ترقی کا سلسلہ جاری ہے اور ہم ابھی شروع میں ہیں، ہم عالمی سطح پر خدمات اور منصوبوں میں افراد اور خاندانوں کے لیے بہترین معیار زندگی فراہم کرتے رہیں گے، نئے شہری منصوبے امارات میں نئی چمک میں اضافہ کریں گے اور اگلی دہائی کے لیے ہمارے اقتصادی اور سیاحتی ایجنڈے کی حمایت کریں گے۔

انہوں نے کہا کہ دبئی سیاحوں اور رہائشیوں کے لیے مثالی جگہ بننے کے لیے اپنے ساتھ مقابلہ جاری رکھے گا، ہمارا مقصد اس اہم مقام کو مستحکم کرنا ہے جو دبئی نے دنیا کے سب سے خوبصورت اور ترقی یافتہ شہروں میں سے ایک کے طور پر حاصل کیا ہے اور ہم انفرادیت اور کامیابی اور ناممکنات سے جڑے دبئی کے نام کو برقرار رکھیں گے۔