جی سی سی میں مقیم غیرملکیوں کیلئے امارات کے ای ویزہ کی سہولت

خطے میں رہائش پذیر تمام تارکین وطن ای ویزہ کیلئے جنرل ڈائریکٹوریٹ آف ریزیڈنسی فار فارنرز افیئرز دبئی کی ویب سائٹ یا فیڈرل اتھارٹی برائے شناخت، شہریت، کسٹمز اور پورٹس سکیورٹی کو درخواست دے سکتے ہیں

ساجد علی بدھ 23 اکتوبر 2024 16:51

جی سی سی میں مقیم غیرملکیوں کیلئے امارات کے ای ویزہ کی سہولت

دبئی ( اُردو پوائنٹ اخبارتازہ ترین۔ 23 اکتوبر 2024ء ) متحدہ عرب امارات نے جی سی سی ممالک میں مقیم تمام غیرملکیوں کو وزٹ کیلئے 30 دن کے ای ویزہ کی درخواست دینے کی سہولت دے دی۔ خلیجی اخبار الامارات الیوم کے مطابق یو اے ای کی ڈیجیٹل گورنمنٹ نے بتایا ہے یہ ای ویزہ امارات میں 30 دن تک قیام کی اجازت دیتا ہے جس میں مزید 30 دن کی توسیع بھی ممکن ہے، یہ نیا ای ویزہ یا انٹری پرمٹ جی سی سی میں قانونی طور پر مقیم غیرملکیوں کو امارات آنے کے لیے آسانی فراہم کرتا ہے۔

بتایا گیا ہے کہ جی سی سی میں مقیم غیرملکی ای ویزہ کے حصول کے لیے جنرل ڈائریکٹوریٹ آف ریزیڈنسی فار فارنرز افیئرز دبئی کی ویب سائٹ یا فیڈرل اتھارٹی برائے شناخت، شہریت، کسٹمز اور پورٹس سیکیورٹی کو درخواست دے سکتے ہیں، جس کی منظوری اور طریقہ کار مکمل ہونے کے بعد رجسٹرڈ ای میل پر ای ویزہ بھیجا جائے گا۔

(جاری ہے)

معلوم ہوا ہے کہ جی سی سی خطے میں مقیم تارکین وطن کے لیے سفر سے پہلے ای ویزہ حاصل کرنا ضروری ہے جو متحدہ عرب امارات میں داخلے کی تاریح سے 30 دن قیام کی اجازت دیتا ہے، تاہم اماراتی ویزہ کی شرائط کے تحت جی سی سی ممالک کے رہائشی کو اس صورت میں یو اے ای میں داخلے سے روک دیا جائے گا اگر یہ معلوم ہوا کہ غیرملکی کا اقامہ منسوخ یا ختم کردیا گیا ہے یا امارات کا ویزہ حاصل کرنے کے بعد غیرملکی کا پروفیشن تبدیل ہوچکا ہو، غیرملکی کے اقامے کی مدت امارات میں داخلے کے وقت ایک سال سے کم نہیں ہونی چاہیئے، پاسپورٹ کم از کم 6 ماہ تک کے لیے کارآمد ہونا ضروری ہے۔

بتایا جارہا ہے کہ متحدہ عرب امارات میں دو طرح کے ٹرانزٹ ویزے بھی جاری کیے جاتے ہیں جن میں سے ایک 48 گھنٹے کا ہے جو مفت جاری ہوتا ہے اور دوسرا 96 گھنٹے کا ٹرانزٹ ویزہ صرف 50 درہم میں جاری کرایا جاسکتا ہے، ٹرانزٹ ویزہ صرف امارات کی قومی ایئرلائنز کے ذریعے جاری ہوسکتا ہے، ٹرانزٹ ویزوں میں توسیع ممکن نہیں ہے۔ ڈیجیٹل گورنمنٹ نے کہا ہے متحدہ عرب امارات کا 48 گھنٹوں کا مفت ٹرانزٹ ویزہ حاصل کرنے کے لیے ضروری ہے کہ پاسپورٹ یا سفری دستاویز کی میعاد یو اے ای میں داخلے پر 3 ماہ سے کم نہ ہو، وائٹ بیک گراؤنڈ والی تصویر، مکمل ایئر ٹکٹ بھی ضروری ہے یعنی مسافر کے پاس جہاں سے وہ آیا اس ملک اور جہاں جانا چاہتا ہے وہاں کے ملک کا ٹکٹ ہونا چاہیئے جب کہ 96 گھنٹے کے ٹرانزٹ ویزہ کے لیے امارات میں داخلے کے وقت پاسپورٹ اور سفری دستاویز کی میعاد کم از کم 6 ماہ ہونی چاہیئے، وائٹ بیک گراؤنڈ والی تصویر اور ایئر ٹکٹ بھی لازمی قرار دی گئی ہے۔