دبئی میں زیرزمین تیزترین سفر کیلئے 'دبئی لوپ' منصوبے کا اعلان

دبئی ( اُردو پوائنٹ اخبارتازہ ترین۔ 13 فروری 2025ء ) دبئی نے ایلون مسک کی بورنگ کمپنی کے ساتھ 'دبئی لوپ' تیار کرنے کے لیے اشتراک کا اعلان کیا ہے، یہ منصوبہ شہر کے سب سے زیادہ گنجان آباد علاقوں کو جوڑنے کے لیے ڈیزائن کیا گیا ایک زیر زمین ٹرانسپورٹیشن کے جدید نظام پر مشتمل ہوگا۔ گلف نیوز کے مطابق متحدہ عرب امارات کے وزیر مملکت برائے مصنوعی ذہانت، ڈیجیٹل اکانومی اور ریموٹ ورک ایپلی کیشنز اور ورلڈ گورنمنٹس سمٹ کے وائس چیئر عمر سلطان العلاما نے عالمی حکومتوں کے سربراہی اجلاس میں ایلون مسک کے ساتھ ایک مکمل سیشن کے دوران یہ اعلان کیا اور کہا کہ آج ہم دبئی لوپ کے مشترکہ پروجیکٹ کا اعلان کرتے ہیں، یہ ایک لوپ پروجیکٹ ہے جو دبئی کے سب سے زیادہ گنجان آباد علاقوں کا احاطہ کرنے جا رہا ہے تاکہ لوگ بغیر کسی رکاوٹ کے ایک سے دوسرے پوائنٹ تک جا سکیں، ہم لوگوں کی زندگیوں کو بدلنے کی امید رکھتے ہیں۔

(جاری ہے)

اس موقع پر ورچوئل خطاب کرتے ہوئے ایلون مسک نے بتایا کہ یہ ایک وارم ہول کی طرز کا منصوبہ ہوگا، آپ صرف شہر کے ایک حصے سے ورم ہول میں جائیں گے اور بجلی کی سی تیزی سے سفر کرت ہوئے شہر کے کسی دوسرے مقام پر فوری باہر نکل جائیں گے یہ بہت اچھا ہے، مجھے لگتا ہے یہ بہت دلچسپ ہوگا، مجھے لگتا ہے ایک بار جب لوگ اسے آزمائیں گے تو وہ کہیں گے کہ یہ واقعی شاندار ہے، پس منظر میں یہ بہت واضح لگتا ہے لیکن جب تک آپ واقعی ایسا نہیں کرتے آپ نہیں جان سکتے کہ واقعی بہت اچھا ہونے جا رہا ہے۔

انہون نے مزید وضاحت کی کہ زلزلے میں محفوظ ترین جگہوں میں سے ایک زیر زمین سرنگ ہے، زلزلے بڑے پیمانے پر سطحی رجحان ہیں اسے سمندر کی لہروں کی طرح سمجھیں، اگر آپ سرنگ میں ہیں تو یہ طوفان کے دوران آبدوز میں رہنے کی طرح ہے یعینی آپ اس میں محفوظ ہیں، مثال کے طور پر جب میکسیکو سٹی میں کئی دہائیوں قبل ایک زبردست زلزلہ تو وہاں سب سے محفوظ جگہ سب وے سسٹم تھی، یہ سرنگیں ناصرف زلزلوں کے خلاف بلکہ انتہائی موسمی حالات جیسے ریت کے طوفان سے بھی تحفظ فراہم کرتی ہیں، جو متحدہ عرب امارات میں عام ہیں۔

بتایا جارہا ہے کہ بورنگ کمپنی ایک بنیادی ڈھانچے اور سرنگ کی تعمیر کی خدمات کی کمپنی ہے جس کی بنیاد ایلون مسک نے 2016ء میں رکھی تھی، اسے زیر زمین نقل و حمل کے نظام کو ترقی دے کر شہری ٹریفک کی بھیڑ کو دور کرنے کے لیے بنایا گیا تھا، کمپنی کم لاگت، تیزی سے کھودنے والی سرنگوں پر توجہ مرکوز کرتی ہے جو گاڑیوں، مال برداری اور تیز رفتار ٹرانزٹ کے لیے استعمال کی جا سکتی ہیں۔