شارجہ میں ویزا خلاف ورزی پر معافی سے متعلق وضاحت جاری کردی گئی

شارجہ ( اُردو پوائنٹ اخبارتازہ ترین ۔ 03 جنوری 2022ء ) شارجہ پولیس نے ویزا خلاف ورزی پر معافی سے متعلق وضاحت جاری کردی ، جس میں سوشل میڈیا پر ریذیڈنسی کی خلاف ورزی کرنے والوں کو اپنی قانونی حیثیت میں ترمیم کرنے کے بارے میں گردش کرنے والی ایک رپورٹ کی تردید کی گئی ہے۔ اماراتی میڈیا کے مطابق یہ وضاحت اس وقت سامنے آئی جب بڑی تعداد میں ایشیائی کارکنوں نے اس رپورٹ کے بارے میں استفسار کیا جس میں کہا گیا تھا کہ وہ سروس سینٹر کے ذریعے تھوڑی سی فیس کے عوض اپنی غیر قانونی حیثیت میں ترمیم کر سکتے ہیں۔

خبر کے جعلی ہونے کی تصدیق کرتے ہوئے پولیس نے سوشل میڈیا پر افواہیں پھیلانے کے خلاف خبردار کیا ، ان کا کہنا تھا کہ یہ ایک ایسا جرم ہے جس کی سزا قانون کے مطابق ہے ، پولیس نے رہائشیوں سے کہا کہ وہ معلومات کو گردش کرنے سے پہلے اس کی تصدیق کریں ، ان کے پاس سوشل میڈیا پر افواہوں کے ذرائع کا پتہ لگانے اور اس کے ذمہ داروں کو گرفتار کرنے کی تکنیکی مہارت ہے۔

(جاری ہے)

واضح رہے کہ متحدہ عرب امارات کے پبلک پراسیکیوشن نے افواہیں پھیلانے اور جھوٹی خبریں پھیلانے کی سزاؤں پر روشنی ڈالی تھی ، جس کے تحت جھوٹی خبریں ، افواہیں یا گمراہ کن معلومات شائع کرنے ، پھیلانے یا پھیلانے کے لیے انٹرنیٹ کا استعمال کرنے والے کو کم از کم ایک سال قید اور 100,000 درہم جرمانہ ہو سکتا ہے۔ اسی طرح امارات کے اٹارنی جنرل ڈاکٹر حمد سیف الشامسی نے کورونا کے پھیلاوٴ کو روکنے کیلیے مقرر جرمانوں اور سزاوٴں کی اپ ڈیٹ فہرست جاری کی ہے ، بیان میں کہا گیا کہ ’ قرنطینہ کی ہدایات پرعمل نہ کرنے، دھوکہ دہی، احتیاطی تدابیر پر اداروں یا کمپنیوں کی جانب سے عمل نہ کرنے اور چیک پوائنٹس پر روکے جانے کے وقت یا جوڈیشل آرڈرز کی خلاف ورزی پر عائد جرمانے شامل ہیں ، جعلی خبریں‘ معلومات یا کورونا وائرس سے متعلق افواہیں پھیلانے اور کمرشل مقاصد والی گاڑیوں کیلیے عارضی داخلہ قواعد کی خلاف ورزی پر بھی جرمانے عائد کیے جائیں گے ، اٹارنی جنرل آفس نے شہریوں اور مقیم افراد کو کو کہا ہے کہ ’وہ قوانین کی پابندی، کورونا سے بچاوٴ کے احتیاطی اقدامات پر عمل کریں اور صحت و تحفظ کے لیے متعلقہ حکام کے فیصلوں کی پابندی کریں۔