شارجہ کے حاکم نے کارکنوں کے دل جیت لیے

شارجہ ( اُردو پوائنٹ اخبارتازہ ترین ۔ 13 جنوری 2022ء ) متحدہ عرب امارات کی ریاست شارجہ کے حاکم نے کارکنوں کے دل جیت لیے ۔ گلف نیوز کے مطابق حاکم شارجہ شیخ سلطان کی ہدایت پر کنسٹرکشن کمپنیوں کے ملازمین کو گرم ملبوسات اور سردی سے بچانے والی دیگر اشیاء بطور تحفہ فراہم کی گئی ہیں ، تعمیراتی کمپنیوں کے کارکنوں کو شارجہ چیریٹی انٹرنیشنل (SCI) کی جانب سے شروع کی گئی 'گرم موسم سرما' مہم میں شارجہ کی لیبر اسٹینڈرڈز ڈویلپمنٹ اتھارٹی(LSDA) کی طرف سے فراہم کردہ موسم سرما کے کپڑوں کے 500 بیگ اور کور موصول ہوئے ہیں ، اس دوران ایل ایس ڈی اے کی ایک ٹیم نے مزدوروں کے ساتھ اظہار یکجہتی اور ان کی سماجی ذمہ داری کے حصے کے طور پر کمپنیوں کی انتظامیہ کے ساتھ مل کر تعمیراتی مقامات کا دورہ بھی کیا ۔

(جاری ہے)

ایل ایس ڈی اے کے چیئرمین سلیم یوسف القیصر نے کہا کہ یہ مہم اتھارٹی کے مقاصد کو پورا کرتی ہے جس میں کارکنوں کی تعریف اور سماجی اور اقتصادی ترقی میں ان کے اہم کردار کو پورا کیا جاتا ہے ، کارکنوں کی حمایت میں توسیع سپریم کونسل کے ممبر اور شارجہ کے حکمران شیخ سلطان بن محمد القاسمی کے وژن اور ہدایات کے مطابق ہے ، جنہوں نے ہمیشہ ترقیاتی عمل میں کارکنوں کے ادا کردہ اہم کردار پر زور دیا ہے۔

خیال رہے کہ حاکم شارجہ اور سپریم کونسل کے رکن شیخ سلطان بن محمد القاسمی نے متحدہ عرب امارات کے 50 ویں قومی دن کے موقع پر 237 قیدیوں کی سزا معاف کرنے کا بھی اعلان کیا تھا ، شارجہ کی جیل میں مقید یہ تمام قیدی معافی کے معیار پر اترنے میں کامیاب رہے تھے ، ان تمام قیدیوں کے جرمانے اور قرض معاف کر دیے گئے تھے جب کہ ان قیدیوں کے جرائم اور شناخت کے حوالے سے مزید تفصیلات بھی جاری کرنے سے روک دیا گیا تھا۔