100 بار کوشش کرنے کے بعد قسمت کی دیوی مہربان

شارجہ میں مقیم غیرملکی شہری 1 ارب 90 کروڑ روپے کا انعام جیت کر مالا مال ہوگیا

ساجد علی بدھ 5 فروری 2025 16:05

100 بار کوشش کرنے کے بعد قسمت کی دیوی مہربان

شارجہ ( اُردو پوائنٹ اخبارتازہ ترین۔ 05 فروری2025ء ) شارجہ میں مقیم بھارتی شہری پر قسمت کی دیوی مہربان ہوگئی جس نے 25 ملین درہم (تقریباً ایک ارب 90 کروڑ پاکستانی روپے) کا انعام جیت لیا۔ گلف نیوز کے مطابق اشیک پٹن ہارتھ نے ابوظبی کی بگ ٹکٹ سیریز 271 کے ڈرا میں 25 ملین درہم کا انعام جیتا، وہ اس جیک پاٹ کے تنہا مالک بن گئے، کیرالہ سے تعلق رکھنے والے اور رئیل اسٹیٹ کے شعبے سے وابسہ 38 سالہ اشیک پٹن ہارتھ نے کہا کہ 10 سال سے اپنی قسمت آزما رہا تھا، جس کے لیے اپنے طور پر ٹکٹ خرید لیتا تھا، تقریباً 100 ٹکٹ خریدے ہوں گے اور اب آخر کار پہلی بار لاٹری جیت ہی گیا، اس بار قرعہ اندازی میں میرے پاس 6 ٹکٹ تھے اور میں نے ٹکٹ نمبر 456808 کے ساتھ انعام جیتا جو میں نے 29 جنوری کو آن لائن خریدا تھا۔

ان کا کہنا ہے کہ گزشتہ ماہ بگ ٹکٹ نے مجھے ایک ہزار درہم میں 6 ٹکٹس کی پیشکش کی تھی اور ان میں سے ایک ٹکٹ میرے لیے خوش قسمت ثابت ہوا، جب شو کے میزبان رچرڈ اور بوچرا نے خوشخبری دینے کے لیے فون کیا تو ابتدائی طور پر مجھے شک ہوا، میں اس وقت دراصل اپنے گھر والوں کے ساتھ فون کال پر تھا، جب مجھے بگ ٹکٹ کا فون آیا، میرے لیے یہ تھوڑا مشکوک تھا، خاص طور پر چوں کہ میں رئیل اسٹیٹ کے شعبے میں ہوں اور فراڈز سے محتاط رہتا ہوں۔

(جاری ہے)

بتایا گیا ہے کہ اشیک پٹن ہارتھ اس رقم سے رئیل اسٹیٹ انڈسٹری میں اپنے قدم جمانے کا ارادہ رکھتے ہیں، ان کی بیوی، 3 بچے، دو بہنیں اور والدین بھی اس خوشی میں شریک ہیں، انہوں نے کہا کہ میں ہمیشہ رئیل اسٹیٹ کے شعبے میں پھلنا پھولنا چاہتا تھا اور اب میں اپنے خوابوں کو پورا کر سکتا ہوں، تاہم میں آئندہ بھی ٹکٹ خریدتا رہوں گا، جن لوگوں نے اب تک کامیابی حاصل نہیں کی میں ان سے کہتا ہوں کوشش جاری رکھیں، ایک دن وہ بھی میری طرح خوش قسمت ہوں گے۔