امریکی صدارتی الیکشن؛ واشنگٹن میں سکیورٹی ہائی الرٹ

نتائج آنے کے ساتھ ہی وائٹ ہاؤس کے باہر لوہے کی باڑ لگا دی گئی

ساجد علی بدھ 6 نومبر 2024 10:45

امریکی صدارتی الیکشن؛ واشنگٹن میں سکیورٹی ہائی الرٹ

واشنگٹن ( اُردو پوائنٹ اخبارتازہ ترین۔ 06 نومبر 2024ء ) امریکہ میں صدارتی الیکشن کے نتائج کا سلسلہ شروع ہونے کے بعد بڑھتے ہوئے تناؤ کی وجہ سے واشنگٹن ڈی سی میں سکیورٹی ہائی الرٹ کردی گئی۔ مقامی میڈیا کے مطابق شہر میں جگہ جگہ سکیورٹی اہلکار پولیس موبائلز میں گشت پر مامور ہیں، وائٹ ہاؤس کے ارد گرد 8 فٹ اونچی لوہے کی باڑ بھی لگادی گئی ہے، کیپیٹل کی عمارت کے گرد بھی باڑ اور رکاوٹیں کھڑی کردی گئی ہیں، اسی طرح کئی کاروباری افراد نے حفاظتی اقدامات کے تحت اپنے کاروبار بند کر دیئے۔

بتایا گیا ہے کہ اوریگن، پنسلوینیا، اور کیلیفورنیا میں بھی مزید سخت حفاظتی اقدامات کیے گئے ہیں کیوں کہ پولنگ کے دوران امریکی ریاست جارجیا کی فلٹن کاؤنٹی کے 5 پولنگ اسٹیشنز پر بم کی افواہ سامنے آئی، دھمکیوں کے باعث دو مقامات سے ووٹرز کے انخلا پر ووٹنگ کا عمل بھی تاخیر کا شکار ہوا۔

(جاری ہے)

بتایا جارہا ہے کہ امریکی صدر کے انتخاب کیلئے متعدد ریاستوں میں پولنگ کا وقت ختم ہونے کے بعد ووٹوں کی گنتی اور نتائج آنے کا سلسلہ جاری، اب تک کے نتائج میں ری پبلکن امیدوار ڈونلڈ ٹرمپ کو برتری حاصل ہے، ایوان نمائندگان میں ری پبلکن 174 اور ڈیموکریٹس 133 نشستوں پر کامیاب ہوچکے ہیں، سینیٹ میں ری پبلکن نے 51 نشستوں کے ساتھ اکثریت حاصل کرلی ہے جبکہ ڈیموکریٹس نے ایوان بالا کی 43 نشستیں جیت لی ہیں۔

معلوم ہوا ہے کہ متعدد ریاستوں انڈیانا، کینٹکی، جیارجیا، اوہائیو، ورجینیا اور کیرولینا میں پولنگ مکمل ہوچکی ہے اور ووٹوں کی گنتی اور نتائج آنے کا سلسلہ جاری ہے جب کہ کئی ریاستوں میں ووٹنگ جاری ہے، پانسہ پلٹنے والی ریاستوں میں سے ایک ریاست شمالی کیرولائنا، ویسٹ ورجینیا، اوہائیو ، الینوائے، میری لینڈ اور پینسلوینیا میں بھی پولنگ کا وقت ختم ہونے کے بعد ووٹوں کی گنتی جاری ہے۔