حاتم الاصم رحمتہ اللہ علیہ فرماتے ہیں کہ جب مجھے چارباتوں کا علم حاصل ہواہے۔میں علم کے تمام علوم سے بے پروا ہوگیا ہوں۔لوگوں نے دریافت کیا وہ کونسی چارباتوں کا علم ہے؟ انہوں نے فرمایا ایک یہ کہ میں نے جان لیا ہے کہ میرا رزق مقدر ہوچکا ہے۔جس میں نہ کمی ہوسکتی ہے نہ زیادتی۔لہٰذا زیادہ کی خواہش سے بے نیاز ہوں اور دوسری یہ کہ میں نے جان لیا ہے کہ خدا کا مجھ پر حق ہے۔جسے میرے سوا کوئی دوسرا ادا نہیں کر سکتا۔لہٰذا میں اس کی ادائیگی میں مشغول ہوں اور تیسری یہ کہ میرا کوئی طالب ہے۔یعنی موت میری خواستگار ہے جس سے میں راہ فرار اختیارکرنہیں سکتالہٰذا میں نے اسے پہچان لیا ہے اور چوتھی یہ کہ میں نے جان لیا ہے کہ میرا کوئی مالک ہے جو ہمہ وقت مجھے دیکھ رہا ہے۔میں اس سے شرم کرتا ہوں اور نافرمانیوں سے باز رہتا ہوں۔بندہ جب اس سے باخبر ہوجاتا ہے کہ اللہ تعالیٰ اسے دیکھ رہا ہے تو وہ کوئی کام ایسا نہیں کرتا جس کی وجہ سے قیامت کے دن اسے شرمسار ہونا پڑے۔