ڈپٹی کمشنر ایبٹ آباد کی کھٹمنڈو ٹی20- سپیشل ویل چیئر کر کٹ ٹورنامنٹ کیلئے نامزدگی پر کرکٹر اشتیاق حسین کو مبارکباد

بدھ 24 اپریل 2019 11:05

ایبٹ آباد ۔ (اُردو پوائنٹ اخبارتازہ ترین - اے پی پی۔ 24 اپریل2019ء) ڈپٹی کمشنر ایبٹ آباد عامر آفاق نے کھٹمنڈو ٹی20- سپیشل ویل چیئر کر کٹ ٹورنامنٹ میں شرکت کیلئے نامزدگی پر ایبٹ آباد سے تعلق رکھنے والے خصوصی کرکٹر اشتیاق حسین کو مبارکباد پیش کی ہے، انہیں کھٹمنڈو روانگی سے قبل ضلعی انتظامیہ کی جانب سے حوصلہ افزائی کا چیک پیش کیا۔ ٹی 20- ویل چیئر ٹورنامنٹ یکم تا 6 مئی تک نیپال کے دارالحکومت کھٹمنڈو میں منعقد ہو گا۔

(جاری ہے)

سپیشل کرکٹر اشتیاق حسین نے ڈی سی آفس میں ڈپٹی کمشنر سے ملاقات کی اور ان سے خصوصی افراد کی کرکٹ کے فرو غ پر تبادلہ خیال کیا۔ ڈپٹی کمشنر نے اس موقع پر کہا کہ کھیلوں کی سرگرمیوں میں حصہ لینا تمام خصوصی افراد کیلئے سود مند ہے اور ضلعی انتظامیہ خصوصی افراد کو کھیلوں میں شرکت کیلئے ہر ممکن مواقع اور سہولیات فراہم کرتی رہے گی۔ انہوں نے امید ظاہر کی کہ کھٹمنڈو ٹورنامنٹ میں اشتیاق حسین کی شرکت سے ملک و قوم کے ساتھ ساتھ ایبٹ آباد کا نام بھی روشن ہو گا۔