تحصیل اٹک میں آٹے کا کوئی بحران نہیں ہے، اسسٹنٹ کمشنر

پیر 27 جنوری 2020 20:38

اٹک ۔ (اُردو پوائنٹ اخبارتازہ ترین - اے پی پی۔ 27 جنوری2020ء) اسسٹنٹ کمشنر اٹک جنت حسین نیکوکارہ نے میڈیا سے خصوصی گفتگو کرتے ہوئے کہا ہے کہ تحصیل اٹک میں آٹے کا کوئی بحران نہیں ہے، تحصیل بھر میں آٹا وافر مقدار میں دستیاب ہے، دکانوں کے علاوہ مختلف آٹا پوائنٹس قائم کیے گئے ہیں جہاں سرکاری نرخ پر آٹا مہیا کیا جا رہا ہے۔

(جاری ہے)

انہوں نے کہا کہ وزیرِ اعلیٰ پنجاب عثمان بزدار کے احکامات اور ڈپٹی کمشنر علی عنان قمر کی خصوصی ہدایات پر میں تحصیل بھر میں آٹے کی فراہمی کے لیے خصوصی اقدامات کیے جا رہے ہیں، تحصیل بھر سے اے سی آفس میں آٹے کی کمی کی کوئی خاص شکایت موصول نہیں ہوئی ہے، دکانداروں کے علاوہ موبائل گاڑیوں کے ذریعے تحصیل بھر میں سرکاری نرخوں پر آٹا فراہم کیا جا رہا ہے، ضلع اٹک خصوصاً تحصیل اٹک میں ایک دن بھی آٹے کی فراہمی میں تعطل نہیں آنے دیا گیا، ہماری اطلاعات کے مطابق سرکاری نرخوں پر آٹا وافر مقدار میں موجود ہے جبکہ اس کے مقابلے میں خریداروں کی کمی ہے۔

انہوں نے کہا کہ اگر عوام الناس کو آٹے کی فراہمی کے سلسلے میں کوئی بھی شکایت ہو تو وہ اے سی آفس اٹک سے رجوع کر سکتا ہے ان کی شکایت کا فوری ازالہ کیا جائے گا۔